Valpoi Municipal Council : वाळपई नगराध्यक्षपदी शेख बिनविरोध; एकमेव अर्ज

Valpoi Municipal Council : वाळपई नगरपालिकेच्या उपनगराध्यक्षपदी इद्रूस शेख यांची बिनविरोध निवड शुक्रवारी करण्यात आली आहे. अलिखित करारानुसार अनिल काटकर यांनी उपनगराध्यक्षपदाचा राजीनामा काही दिवसांपूर्वी दिला होता.

या पदासाठी इद्रुस शेख यांचा एकमेव अर्ज सादर झाला होता. त्यामुळे निवडणूक अधिकारी तथा उपजिल्हाधिकारी प्रवीण परब यांनी इद्रूस शेख यांची उपनगराध्यक्षपदी बिनविरोध निवड झाल्याचे जाहीर केले.

यावेळी नगराध्यक्ष शेहझीन शेख, नगरसेवक रामदास शिरोडकर, सय्यद सरफराज, अनिल काटकर, प्रसन्ना गावस, निर्मला साखळकर, वासुउद्दीन सय्यद, शराफत खान, विनोद हळदणकर, मामलेदार तथा पालिका मुख्याधिकारी दशरथ गावस यांची उपस्थिती होती.

नगराध्यक्ष शेहझीन शेख म्हणाल्या, इद्रुस शेख यांना काही वर्षांपूर्वीही एकदा हे पद देण्यात आले होते. त्यामुळे कामाचा चांगला अनुभव आहे. विश्वजीत राणेंच्या मार्गदर्शनाखाली आम्ही सर्व नगरसेवक काम करीत आहोत. शेख यांचे पुष्पहार घालून अभिनंदन करण्यात आले.

वाहतूक समस्या सोडविणार

नवनिर्वाचित उपनगराध्यक्ष इद्रुस शेख म्हणाले, आम्ही सर्व दहाही नगरसेवक एकत्रित राहून काम करीत आहे. वाळपईतील विविध विकास कामे राणेंच्या मार्गदर्शनाखाली केली जातील. वाळपईतील वाहतूक समस्या सोडविण्यावर भर दिला जाणार आहे.