Panaji News : अपयश अनेक गोष्टी नव्याने शिकवते : डॉ. श्रीधर सोमनाथ

Panaji News : पणजी, ‘चांद्रयान-२’ प्रक्षेपणात आलेल्या अपयशातून आम्ही अनेक गोष्टी नव्याने शिकलो. ‘चांद्रयान-२’च्या अपयशाची कोणती कारणे होती यावर विचारमंथन करून त्या चुका पुन्हा होणार नाहीत याकडे लक्ष दिले. ‘चांद्रयान ३’च्या प्रक्रियेसाठी चार वर्षांचा कालावधी लागला.

ज्यावेळी यश मिळते त्यावेळी आपल्याला आनंद मिळतो; परंतु ज्यावेळी अपयश येते त्यावेळी ते अनेक गोष्टी नव्याने शिकवते, असे इस्त्रोचे प्रमुख डॉ. श्रीधर सोमनाथ यांनी सांगितले. ते दोनापावल येथे आयोजित मनोहर पर्रीकर विचार महोत्सवात प्रमुख वक्ते या नात्याने बोलत होते.

डॉ. सोमनाथ म्हणाले, ‘चांद्रयान-३’मध्ये ‘चांद्रयान-२’च्या तुलनेत अधिक सुधारणा करण्यात आल्या होत्या. विक्रम लॅंडर अधिक भक्कम केला होता. अधिक इंधन, सोलार पॅनल, सेन्सर, कॅमेरा तसेच इतर बाबी अधिक होत्या.

भारताने ५० हून अधिक उपग्रह अंतराळात पाठविले आहेत. त्याचा फायदा आपल्या दैनंदिन जीवनात होतो. हवामान, संवाद, संरक्षण तसेच इतर क्षेत्रात ते महत्त्वाचे योगदान देत असतात. संवाद क्षेत्रातील एटीएम, डीटीएच, आर्थिक व्यवहार या उपग्रहांमुळे शक्य होतात.