फेसबुकद्वारे मैत्री आणि लग्नाचे आमिष, गुंगीचे औषध देऊन बलात्कार; फरार आरोपीला गोव्यातून अटक

फेसबुकद्वारे मैत्री करत लग्नाचे आमिष दाखवून मुलीवर बलात्कार करणाऱ्या आरोपीला गोव्यातून अटक करण्यात आली आहे. हॉटेलमध्ये भेटण्यासाठी बोलवत आरोपीने तरूणीला कोल्ड्रिंक मधून गुंगीचे औषध पाजले, त्यानंतर बलात्कार केला. असा आरोप तरूणीने केला आहे. आशियाना, लखनऊ येथे जुलै 2023 मध्ये ही घटना घडली.

मुकेश गुप्ता (रा. बलिया ) असे अटक करण्यात आलेल्या आरोपीचे नाव आहे.

लखनऊच्या आशियाना पोलिसांनी एका हिंदी वृत्तपत्राला दिलेल्या माहितीनुसार, बलिया येथील रहिवासी मुकेश गुप्ता याला गोव्यातील मडगाव येथून अटक करण्यात आली आहे. मुकेश विरोधात तरुणीने जुलै 2023 मध्ये दिलेल्या तक्रारीनंतर गुन्हा दाखल केला आहे.

पीडितेने दिलेल्या तक्रारीनुसार, फेसबुकवर चॅटिंग करत असताना मुकेशने तिला लग्नाचे आमिष दिले. त्यानंतर दोघेही भेटण्यासाठी लखनौला आले. मुकेशने तिला हॉटेलमध्ये नेऊन कोल्ड्रिंक मधून गुंगीचे औषध पाजले. त्यानंतर त्याने तिच्यावर बलात्कार केला.

पीडितेने विरोध केला असता आरोपीने तिला लग्नाचे आमिष दिले. लैंगिक शोषणाची शिकार झालेली पीडित तरूणी बलिया येथील मुकेशच्या घरी पोहोचली आणि त्याच्यावर लग्नासाठी दबाव निर्माण करू लागली.

पण, तिथे आरोपीच्या भावाने तरूणीला मारहाण करून तिला माघारी पाठवले. त्यानंतर तरुणीने आशियाना पोलिस ठाण्यात तक्रार दाखल केल्यानंतर, पोलिसांनी गुन्हा दाखल केला. दरम्यान, फरार आरोपीला मडगाव, गोवा येथून पकडण्यात आले आहे.