एफसी गोवा प्रशिक्षकांना चमत्काराची अपेक्षा

पणजी: एफसी गोवाने आठव्या इंडियन सुपर लीग (आयएसएल) फुटबॉल स्पर्धेत दोन वेळच्या माजी विजेत्या चेन्नईयीन एफसीचा पाच गोलने धुव्वा उडविला, त्यानंतर आपल्याला चमत्काराची अपेक्षा असून संघ तीस गुणांचा टप्पा गाठू शकतो, असा विश्वास मुख्य प्रशिक्षक डेरिक परेरा यांनी व्यक्त केला.

स्पॅनिश आघाडीपटू होर्गे ओर्तिझ याच्या हॅटट्रिकच्या बळावर एफसी गोवाने बुधवारी रात्री वास्को येथील टिळक मैदानावर चेन्नईयीनला 5-0 फरकाने पराभूत केले. त्यानंतर डेरिक बोलत होते. एफसी गोवाचे (FC Goa) सध्या 16 लढतीतून 18 गुण झाले आहेत. बाकी चारही सामने जिंकले, तर त्यांना प्ले-ऑफ फेरीची संधी असेल.

‘‘होय, चमत्कार घडतात, देवावर श्रद्धा असल्यास काहीही शक्य असल्याचे मला वाटते. प्रत्येक सामन्यागणिक आमचे नियोजन असेल. पुढील सामना खूप महत्त्वाचा आहे, तो खडतरच असेल, पण आम्ही अपेक्षित निकालासाठी कामगिरी करण्याच्या उद्देशाने मैदानावर जाऊ. अखेरीस आम्ही कुठवर मजल मारू हे स्पष्ट होईल,’’ असे 59 वर्षीय डेरिक म्हणाले. एफसी गोवाचा पुढील सामना 15 फेब्रुवारी रोजी बांबोळी येथील ॲथलेटिक स्टेडियमवर एटीके मोहन बागानविरुद्ध होईल.

खेळाडूंच्या मेहनतीमुळे विजय

एफसी गोवा संघातील खेळाडूंनी अथक मेहनत घेतली, त्यामुळेच चेन्नईयीनविरुद्ध संस्मरणीय विजय नोंदविता आला, असे मतही डेरिक यांनी व्यक्त केले. पाच सामने विजयाविना राहिल्यानंतर त्यांनी बुधवारी रात्री विजयासह गवसणी घातली. एकंदरीत एफसी गोवाचा हा चौथा विजय ठरला. चेन्नईयीनविरुद्ध पूर्वार्धात चार गोलची आघाडी घेतल्यानंतर एफसी गोवाने प्रतिस्पर्ध्यांना डोके वर काढूच दिले नाही. हॅटट्रिकवीर ओर्तिझ दुखापतीमुळे दोन सामन्यांस मुकला होता, मात्र टिळक मैदानावर त्याने दणक्यात पुनरागमन केले.

अनपेक्षित निकाल

‘‘प्रामाणिकपणे सांगायचे झाल्यास, मला कठीण आव्हानाची अपेक्षा होती. मला वाटतं, आम्ही चांगला खेळ केला. सामन्यावर नियंत्रण योग्यप्रकारे राखले. गोल करण्याची वेळ निर्णायक ठरली, नंतर आम्ही वर्चस्व निसटू दिले नाही. माझ्या मते, या निकालासाठी खेळाडूंनी खूप मेहनत घेतली,’’ असे डेरिक यांनी नमूद केले. चेन्नईयीनला स्थिरावू द्यायचे नाही हे लक्ष्य बाळगूनच एफसी गोवाने खेळ केल्याचेही त्यांनी स्पष्ट केले. अगोदरच्या लढतीत आघाडीफळीतील सदोष नेमबाजीमुळे एफसी गोवाचे नुकसान झाले, ही चूक आम्ही दुरुस्त केली. आता बाकी सामने खडतर असल्याने आम्हाला आघाडीफळीत भेदकता राखावी लागेल, असे डेरिक यांनी सांगितले.