‘गोव्यातील वीज कमतरतेमुळे उद्योजकांची पाठ’

पणजी: गोवा सरकारने गुंतवणूक प्रोत्साहन मंडळ स्थापन नव्या उद्योजकांना साधनसुविधा उपलब्ध करण्याचे आश्‍वासन देऊन निमंत्रण दिले आहे. मात्र, मोठे उद्योग किंवा कंपन्या गोव्यातील वीज समस्या व तुटवड्यामुळे येत नाहीत, असे वक्तव्य वीजमंत्री सुदिन ढवळीकर यांनी केले आहे.

ते पुढे म्हणाले, की राज्यात भारनियमनाची समस्या ही गेल्या अनेक वर्षांपासून आहे. केंद्र सरकारचा तम्नार ट्रान्समिशन प्रकल्प गोव्यात होऊ घातला आहे. हा प्रकल्प उद्योजकांना पुरेसा वीजपुरवठा करणे शक्य व्हावे त्यासाठीच होत आहे. मात्र, या प्रकल्पासाठी हजारो झाडांची कत्तल होत असल्याने व पर्यावरणावर त्याचा परिणाम होत आहे. त्यामुळे त्याला लोकांनी विरोध केल्याचे ढवळीकर यांनी सांगितले.

दरम्यान, हल्लीच सर्वोच्च न्यायालयात असलेल्या या प्रकरणात उच्चाधिकार समितीने सादर केलेल्या शिफारशीनुसार हा प्रकल्प सध्या अस्तित्वात असलेल्या जुन्या वीज वाहिनीच्या मार्गानुसार नेण्यात यावा असे नमूद केले होते व त्याला सर्वोच्च न्यायालयाने मान्यताही दिली आहे. राज्यातील तीन रेषीय प्रकल्प प्रकरण सर्वोच्च न्यायालयात आहे. त्यामध्ये तम्नार ट्रान्समिशन, दुहेरी रेल्वेमार्ग व महामार्गाचे रुंदीकरण याचासमावेश आहे.