सुधारित वाहन कायद्याची पेडण्यात अंमलबजावणी

मोरजी: सुधारित मोटर वाहन कायद्याची राज्यात अंमलबजावणी आजपासून सुरू झाली असून पेडण्यात वाहतूक पोलिसांनी राष्ट्रीय महामार्ग 66 वर उभे राहून बेशिस्त वाहनचालकांवर दंडात्मक कारवाई सुरू केली.त्यामुळे कारवाईचा धसका घेऊन हेल्मेट परिधान करणाऱ्या दुचाकीस्वारांची संख्या वाढल्याचे चित्र महामार्गावर दिसून आले.

पूर्वीच्या कायद्यापेक्षा दहापट अधिकची दंडात्मक कारवाई सुरू करण्यात आली आहे. त्यानुसार पेडणे वाहतूक पोलिस रस्त्यावर ठिकठिकाणी उभे राहून येणाऱ्या जाणाऱ्या वाहनांना अडवून त्यांच्या कागदपत्रांची तपासणी करत होते. कोणते नियम मोडले जातात, दुचाकी वाहनांवर दोघे आहेत, हेल्मेट आहे की नाही, चार चाकी वाहनामध्ये सीट बेल्ट वापरला आहे,की नाही. विमा आहे की नाही, परमिट आहे का, अशी विचारणा करून कागदपत्रांची तपासणी केली जात होती.