Goa Government : मंत्री, आमदारांच्या कर्मचाऱ्यांचे वेतनाविना हाल

Goa Government : राज्य सरकारच्या तिजोरीत खडखडाट असल्याने मंत्री व बऱ्याच आमदारांच्या कर्मचाऱ्यांना गेल्या दोन महिन्याचे वेतन मिळाले नाही.

‘मंत्र्यांच्या कर्मचाऱ्यांना दोन महिन्यापासून वेतन मिळाले नाही, आमदारांच्याही कर्मचाऱ्यांचे वेतनांविना हाल होत आहेत, अशी प्रतिक्रिया एका अधिकाऱ्याने या प्रतिनिधी बोलताना दिली.

सरकारकडे वेतन देण्यासाठी निधी नाही, शिवाय अनेक लोकप्रिय योजनांवर फिजुल खर्च चालूच आहे. शिवाय कर्मचाऱ्यांचे वेतन देण्यासाठी वित्तखात्याकडे योग्य वेळेत प्रस्ताव दाखल व्हायला पाहिजेत. ते होत नाही. सरकारचे प्रशासन ढेपाळले आहे, अशी टीका सदर अधिकाऱ्याने केली.

मंत्र्यांना आपल्या कार्यालयासाठी, तसेच निवासस्थानी काही कर्मचारी घेण्यास मुभा असते. ड्रायव्हरपासून वैयक्तिक स्टॉप त्यांना स्वतःच्या मर्जीनुसार घेता येतो. नियमानुसार अशा नियुक्त्या केल्या जातात.

सरकारी तिजोरीतून त्यांना पगार मिळत असतो. दुर्दैवाने गेले काही महिने हा पगार अनियमित बनला असून गेले दोन महिने तर त्यांना वेतनाविना राहावे लागल्याने त्यांची कुचंबणा होत आहे.