Goa Congress: काँग्रेस छाननी समितीपासून एल्विस गोम्स दूरच

Goa Congress: लोकसभा निवडणुकीसाठी गोव्यातील उमेदवार ठरविण्यासाठी आलेल्या काँग्रेसच्या छाननी समितीने आज मडगाव येथे संभाव्य उमेदवार आणि काँग्रेसचे स्थानिक नेते यांच्याशी चर्चा करण्यासाठी ठेवलेल्या बैठकीपासून माजी सनदी अधिकारी एल्विस गोम्स यांना बाहेरच ठेवले.

त्यामुळे एल्विस समर्थकांनी नाराजी व्यक्त करताना काँग्रेस पक्षात लोकशाही पद्धतीने जर उमेदवार ठरविले जातात, तर या बैठकीपासून गोम्स यांना बाहेर का ठेवले? असा प्रश्न केला आहे. मडगाव येथील दक्षिण गोवा जिल्हा कार्यालयात आज छाननी समितीचे अध्यक्ष व गुजरातचे खासदार मधुसूदन मिस्त्री यांच्या अध्यक्षतेखाली ही बैठक झाली.

सूरज हेगडे आणि शफी परंबिल हे अन्य दोन सदस्य यावेळी हजर होते. त्यांनी संभाव्य उमेदवार आणि नेत्यांशी एकेकट्याला बोलावून चर्चा केली. यात दक्षिण गोव्यातील संभाव्य उमेदवार असलेले विद्यमान खासदार फ्रान्सिस सार्दिन, गिरीश चोडणकर व कॅ. विरियातो फर्नांडिस तसेच उत्तर गोव्यातील संभाव्य उमेदवार असलेले माजी खासदार ॲड. रमाकांत खलप, विजय भिके आणि राजन घाटे यांचा समावेश होता.

त्याशिवाय प्रदेश अध्यक्ष अमित पाटकर, विरोधी पक्षनेते युरी आलेमाव, दोन्ही आमदार, अन्य संघटनांचे अध्यक्ष यांचा समावेश होता. या बैठकीला हजर राहण्यासाठी आलेले गिरीश चोडणकर यांना विचारले असता बैठकीचे स्वरूप काय आहे आणि त्यात कशी चर्चा होईल याची आपल्याला कल्पना नाही, असे त्यांनी सांगितले.

काँग्रेस उमेदवारीवर आपला दावा: गोम्स

या बैठकीचे आपल्याला निमंत्रण नव्हते. मात्र, आपला दक्षिण गोव्यातील काँग्रेस उमेदवारीवर अजूनही दावा आहे. वेळोवेळी मी माझी इच्छा व्यक्त करून दाखवलेली आहे, असे एल्विस गोम्स यांनी सांगितले.