सत्तरीत वीज कर्मचाऱ्यांच्या सुरक्षेचा प्रश्‍न ऐरणीवर

वाळपई : सत्तरी तालुक्यात शुक्रवारी कणकिरे गावात हेल्पर लाईनमन संजय गावकर यांचा विजेचा जोरदार झटका लागून निधन झाल्याची घटना घडल्यानंतर सत्तरी तालुक्यात वीज कर्मचाऱ्यांच्या सुरक्षेचा प्रश्‍न ऐरणीवर आला आहे. हेल्पर लाईनमन संजय गावकरच्या मृत्यूला जबाबदार कोण,असा प्रश्‍नही विचारला जात आहे. (electrician dies in Sattari Goa)

आता पावसाळा तोंडावर असून सातत्याने वीज पुरवठा खंडित होण्याचे प्रकार घडतात, त्यामुळे कर्मचाऱ्यांना अहोरात्र तैनात रहावे लागते. त्यामुळे वीज कर्मचाऱ्यांच्या सुरक्षेची काळजी घेऊनच कामाला जुंपावे,अशी मागणी होत आहे.

वास्तविक वीज तारांच्या दुरुस्तीवेळी काम करताना योग्य ती काळजी संबंधित अधिकाऱ्यांनी घेणे गरजेचे असते. एखाद्या क्षेत्रात कर्मचाऱ्याला कामासाठी पाठविल्यानंतर तेथे देखरेखीची गरज असते. पण त्याकडे दुर्लक्ष झाल्याने कर्मचाऱ्याच्या जीवावर बेतणारे प्रसंग घडतात. अशा घटना टाळण्यासाठी कोणती काळजी वा उपाययोजना सरकार हाती घेते याकडे लोकांचे लक्ष लागून आहे.

आज माझा भाऊ गेला. पण पुन्हा अशा घटनेत दुसऱ्या कुणाचाही भाऊ जाऊ नये, अशी विनवणी संजय गावकर यांच्या बहिणीने डोळ्यात अश्रू आणून वीज अधिकाऱ्यांशी बोलताना केली.