Shripad Naik: शिक्षण ही विकासाची गुरुकिल्ली : मंत्री नाईक

Shripad Naik on Education: म्हापसा शिक्षण हीच विकासाची गुरुकिल्ली असून, समाजात आमूलाग्र बदल घडवून आणण्यासाठी शिक्षणसंस्था सुरू करण्याचे काम त्यावेळी वैश्य मंडळाच्या सदस्यांनी केले.

पोर्तुगिजांशी संघर्ष करीत आपल्या असीम त्यागातून ज्ञानप्रसारक मंडळ ही शिक्षणसंस्था स्थापन केली.

आज या संस्थेत केजी ते ‘पीजी’पर्यंत सुमारे ५ हजार विद्यार्थी शिक्षण घेताहेत. शंभर वर्षे संस्था चालवणे सोपे काम नाही. वैश्य मंडळाचा समाज धुरीणांची प्रशंसा केलीच पाहिजे, असे प्रतिपादन केंद्रीय मंत्री श्रीपाद नाईक यांनी केले.

शतक महोत्सवाप्रीत्यर्थ आयोजिलेल्या पाककला स्पर्धा, अंताक्षरी स्पर्धांतील पहिल्या तीन विजेत्यांना तसेच नृत्य स्पर्धेतील विजेत्यांना पाहुण्यांच्या हस्ते बक्षीस वितरण करण्यात आले.

आसगाव येथील ज्ञानप्रसारक मंडळाच्या श्रीमती रुक्मिणी पोकळे स्मृती सभागृहात शनिवारी (ता.१८) आयोजित कार्यक्रमात वैश्यमंडळाच्या शतकोत्सव समारंभात ते प्रमुख अतिथी या नात्याने बोलत होते.

व्यासपीठावर ज्ञानप्रसारक मंडळाचे अध्यक्ष श्रीकृष्ण पोकळे, वैश्यमंडळाचे अध्यक्ष अभय गवंडळकर, सचिव महेश फळारी, खजिनदार यशवंत गवंडळकर, शिवानंद धावजेकर, अखिल भारतीय वैश्यमंडळाचे सचिव मोतीचंद म्हापसेकर व महिला संघटनेच्या किरण नाटेकर या उपस्थित होत्या.

वैश्यमंडळाच्या महिलांनी स्वागतगीत सादर केल्यावर प्रमुख पाहुण्यांच्या हस्ते दिपप्रज्वलन करून कार्यक्रमाला सुरुवात करण्यात आली.

वैश्यमंडळाचे अध्यक्ष अभय गवंडळकर यांनी स्वागत केले. ज्ञानप्रसारक मंडळाचे अध्यक्ष श्रीकृष्ण पोकळे यांनी मंडळ स्थापनेची ऐतिहासिक माहिती दिली. सचिव महेश फळारी यांनी अहवाल सादर केला.

या शतकी महोत्सवात वैश्यमंडळासाठी योगदान दिलेल्या माजी अध्यक्ष, सचिव व इतर पदाधिकाऱ्‍यांचा तसेच कर्मचाऱ्‍यांचाही शाल, श्रीफळ, पुष्पगुच्छ व मानचिन्ह देऊन सत्कार करण्यात आला.

केंद्रीय मंत्री श्रीपाद नाईक यांनी दिलेल्या सहकार्याबद्दलही त्यांचा सन्मान अध्यक्षांच्या हस्ते करण्यात आला. या सोहळ्याचे सूत्रसंचालन राजाराम नार्वेकर व शीतल पावसकर यांनी केले. तर यशवंत गवंडळकर यांनी आभार मानले.