Punjab: अमृतसरवर धुक्याचे जाळे! गोवा आणि कोलकाताला जाणारी विमान उड्डाणे रद्द

पंजाबमधील अमृतसरमध्ये धुक्यामुळे विविध अडचणी निर्माण झाल्या आहेत. गुरुवारी सकाळपासून शहरात धुक्यामुळे दृश्यमानता कमी झाली आहे. याचा थेट परिणाम विमान उड्डाणांवर झाला आहे. श्री गुरु रामदास जी आंतरराष्ट्रीय विमानतळावरून गोवा आणि कोलकाता येथे जाणारी उड्डाणे रद्द करण्यात आली आहेत. तत्पूर्वी, बुधवारी रात्री 10 वाजता दिल्लीहून आलेले एअर इंडियाचे विमान धावपट्टी दिसत नसल्याने सुमारे 20 मिनिटे अमृतसर शहरावरती प्रदक्षिणा घालत राहिले. तर, सहा विमाने उशिरा पोहोचली.

मिळालेल्या माहितीनुसार, बुधवारी रात्री 10 वाजता एअर इंडियाचे विमान अमृतसर विमानतळावर पोहोचले. विमानतळावर इतके दाट धुके होते की विमानाच्या पायलटला धावपट्टीच दिसत नव्हती. यामुळे विमानाच्या पायलटने सुमारे 20 मिनिटे शहराभोवती प्रदक्षिणा घातल्यानंतर विमानाचे यशस्वीरित्या लँडिग केले. तसेच, धुक्यामुळे मुंबईहून अमृतसरला येणारे एक आणि इटलीहून येणारे एक विमान दिल्ली विमानतळावर वळवावे लागले.

धुक्यामुळे गोवा आणि कोलकाताला जाणारी उड्डाणे रद्द करावी लागली. तसेच, दोहाहून येणारे कतार एअरवेजचे विमान पहाटे 2.30 ऐवजी 12.11 वाजता श्री गुरु रामदास जी आंतरराष्ट्रीय विमानतळावर पोहोचले. शारजाहून अमृतसरला येणारे एअर इंडियाचे फ्लाइट (IX138) 54 मिनिटे तर, दुबईहून अमृतसरला येणारे स्पाइस जेटचे विमान सुमारे पाच तास उशिराने आले. तसेच पुण्याहून अमृतसरला येणारे विमान पहाटे 5:20 ऐवजी 5:20 वाजता उतरले. मुंबईहून अमृतसरला येणारी दोन विमानेही काही तास उशिराने अमृतसरला पोहोचली.