Goa News : ग्रामस्थांवरील गुन्हे मागे घेऊ नका : शिवप्रेमींची मागणी

Goa News :

सासष्टी, सां जुझे द आरियल येथील पाद्रीभाट येथे छत्रपती शिवाजी महाराजांचा पुतळा उभारणीवरून जो वाद सुरू आहे तो अजून संपलेला नाही.

आज येथील शिवप्रेमींनी मडगावात पत्रकार परिषद घेऊन ज्या २० ग्रामस्थांवर गुन्हे नोंद करण्यात आले आहेत, ते मागे घेऊ नये, अशी मागणी केली आहे. त्याचबरोबर शिवरायांचा पुतळा उभारणीसाठी आवश्यक परवानगी असल्याचाही दावा केला.

ज्यांच्या जमिनीवर शिवरायांचा पुतळा उभारण्यात आला आहे, त्याचे मालक मेहबूब मुकांदर यांच्यासह आनंद तांडेल व सां जुझे आरियल व परिसरातील शिवप्रेमी या पत्रकार परिषदेस उपस्थित होते.

वेळ्ळीचे आमदार क्रुझ सिल्वा यांना जमिनीची सर्व कागदपत्रे दाखवूनही तेथील लोकांना त्यांनी चिथावण्याचा प्रयत्न केला. सध्या तात्पुरते बांधकाम करून छत्रपती शिवाजी महाराजांचा पुतळा बसविण्यात आला आहे.

पुतळ्याचे निमित्त करून तेथे रस्ता तयार करण्याचा प्रश्र्नच उद्‍भवत नाही. कारण तेथे पूर्वीच ६ मीटर रुंदीचा रस्ता आहे. शिवाय काहींनी रस्त्यासाठी पूर्वीच ना हरकत दाखला दिलेला आहे. आपला या जमिनीचे प्लॉट करून विकण्याचा मुळीच इरादा नाही.

- मेहबूब मुकांदर, जमिनीचे मालक