सावधान! दक्षिण गोव्यात सतत आढळताहेत मृत मासे; विशेष मोहीम राबवण्याची गरज

Ocean Pollution

मडगाव: समुद्रातील वाढत्‍या प्रदूषणाचा परिणाम आता दक्षिण गोव्‍यावरही दिसू लागला आहे. दक्षिण गोव्‍यातील विविध किनाऱ्यावर डॉल्फिन आणि लहान देव मासे मृत अवस्थेत आढळत आहेत. चालू सप्‍टेंबर महिन्‍यात हे प्रमाण अधिकच वाढलेले असून त्‍यामुळे हा चिंतेचा विषय बनला आहे.

ही समस्‍या दूर करण्‍यासाठी सरकार आणि वन्‍य विभाग काय कारवाई करतो याकडे सर्वांचे लक्ष लागून राहिले आहे.

वेळसांव समुद्र किनाऱ्यावर सोमवारी इंडो-पॅसिफिक फिनलेस पोरपोईज (एक प्रकारचा देव मासा) वाहून आलेला आढळला. त्याच दिवशी आगोंद समुद्र किनाऱ्यावर हिंद महासागरातील हंपबॅक डॉल्फिन माशाचे पिल्‍लूही मृत अवस्थेत आढळले.

तज्ज्ञांच्‍या मते जलप्रदूषण, मासेमारीच्या जाळ्यात अडकणे किंवा अन्‍य नैसर्गिक कारणांमुळे हे प्रकार घडत असावेत. सागरी जिवांना भेडसावणारे धोके कमी करण्यासाठी विशेष मोहीम हाती घेण्‍याची मागणी केली जात आहे.