Goa Fraud Case : थिवीमध्ये क्लिनिक असलेल्या एका डॉक्टरसोबत लाखो रुपयांची फसवणूक झाल्याचा प्रकार उघडकीस आला आहे. याप्रकरणात सहभागी असलेल्या तिघांवर कोलवाळ पोलिसांनी गुन्हा नोंद केला आहे.
उपविभागीय पोलीस अधिकारी जीवबा दळवी यांनी दिलेल्या माहितीनुसार, थिवी येथे क्लिनिक असलेल्या एका डॉक्टरांना वैद्यकीय उपकरणे खरेदी करण्यासाठी 93 लाखांचे कर्ज घ्यायचे होते. यावेळी त्यांनी या प्रकरणातील संशयित आरोपी सुशांत कंठक (मडगाव) याच्याशी यासंदर्भात चर्चा केली. सदर आरोपीने डॉक्टरांची ओळख अनंत दत्ताराम वालावलकर (सिंधुदुर्ग, महाराष्ट्र) याच्याशी करून दिली.
संशयित अनंतने आपण बँक अधिकारी असल्याचे भासवत या प्रकरणातील तिसरा आरोपी कामत (जेलरोड, रत्नागिरी, महाराष्ट्र) याची ओळख डॉक्टरांशी करून दिली. आपण बँकेतर्फे कर्ज मंजुरीचे व्यवहार सांभाळत असल्याचे कामत याने डॉक्टरांना सांगितले.
आरोपींनी आपल्या बोलण्यातून डॉक्टरांना आपण बँकेचे कर्मचारी असल्याचे भासवून त्यांना गुंडाळले आणि अनंत वालावलकर याच्या वैयक्तिक खात्यामध्ये 8,67,000 लाख रुपये भरण्यास प्रवृत्त केले.
डॉक्टरांनीही त्यांच्यावर विश्वास टाकत ही रक्कम अधिकृत बँक खात्यात जमा न करता आरोपीच्या वैयक्तिक खात्यामध्ये जमा केली. मात्र त्यानंतर कर्मचारी म्हणून भासवलेले हे आरोपी कर्ज देण्यास असमर्थ ठरल्यानंतर आपली फसवणूक झाल्याचा प्रकार डॉक्टरांच्या लक्षात आला.
त्यानंतर त्यांनी पोलिसात या तिघांविरोधातही तक्रार दाखल केली. दरम्यान पोलिसांनी तिघा आरोपींविरोधात भादंसंनुसार 419, 420 r/w 34 गुन्हा दाखल केला आहे. संबंधित घटनेचा अधिक तपास सुरू आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
