पक्ष नेतृत्वाच्या निर्णयावर काणकोणात असंतोष

आगोंद: गोवा राज्याच्या सभापतीपदाविषयी काणकोणचे आमदार रमेश तवडकर यांना पक्षनेतृत्वाने राजी करून गेले काही दिवस चाललेल्या चर्चेला आज (रविवारी) विराम मिळाला खरा. मात्र, सायंकाळी चावडी येथील कार्यालयात तवडकर यांना कार्यकर्त्यांना पक्षाची भूमिका पटवून देताना नाकीनऊ आले.

यावेळी काणकोण मतदारसंघाच्या कानाकोपऱ्यातून आलेले प्रमुख कार्यकर्ते उपस्थित होते. दक्षिण गोव्यातील एकूण 4 मतदारसंघात प्रभाव पाडलेले व एकूणच भारतीय जनता पक्षाच्या चिन्हावर 4 वेळा निवडून आलेल्या 20 वीसपैकी सर्वांत ज्येष्ठ भाजपा आमदार ठरलेल्या आमदाराला मंत्रिपदापासून डावलले गेल्याने हा दक्षिण गोव्यातील कार्यकर्त्यांवर अन्याय असल्याचे मत कार्यकर्त्यांकडून व्यक्त करून पक्षाच्या निर्णयावर कठोर टीका कली.

जबाबदारी स्वीकारण्यास तयार...

काणकोण मतदारसंघ किंवा अन्य कार्यकर्त्यांनीही पक्षाच्या या निर्णयावर किंचितही शंका बाळगू नये. पक्षाने राज्याच्या सभापतीपदासारख्या उच्च पदावर जबाबदारी आपल्यावर सोपवलेली आहे त्या पदावर केलेल्या निवडीचा मला अभिमान आहे आणि ही जबाबदारी पार पाडण्यात मी सर्वतोपरी यशस्वी होईन. कार्यकर्त्यांनी चिंता करण्याची गरज नाही, असे तवडकर यांनी कार्यकर्त्यांना सांगितले. रात्री उशिरापर्यंत प्रमुख कार्यकर्त्यांच्या प्रश्नांना उत्तर देताना आमदार तवडकर जराही विचलित झाले नाहीत.

दक्षिण गोव्यावर अन्याय

एकूण मंत्रिपदावर पैकी सांगे, सावर्डे, कुंकळ्ळी व काणकोण मतदारसंघाला मंत्रिपद न दिल्यास दक्षिण गोव्यातील बहुतेक सर्व मतदारांवर हा अन्याय असल्याच्या प्रतिक्रिया भाजपा प्रमुख कार्यकर्त्यांकडून यावेळी व व्यक्त करण्यात आल्या. आमदार तवडकर हे ३००० पेक्षा अधिक मताधिक्य घेऊन विजयी ठरलेले आमदार असून, आज त्यांची स्थिती पंख छाटलेल्या पक्ष्याप्रमाणे केली असल्याचे मत काणकोणचे नाट्य कलाकार नारायण देसाई, आगोंद स्पोर्ट्स क्लबचे अध्यक्ष किरण नाईक गावकर यांनी व्यक्त केली आहे.