स्वप्नाळू आणि अव्यवहारी अर्थसंकल्प: दिगंबर कामत

पणजी: मुख्यमंत्री प्रमोद सावंत यांनी आज विधानसभेत मांडलेला अर्थसंकल्प हा स्वप्न दाखवणारा, अव्यवहारी आणि प्रत्यक्षात न उतरणारा अर्थसंकल्प आहे, अशी टीका काँग्रेसचे ज्येष्ठ नेते दिगंबर कामत यांनी केली. विरोधी पक्षाच्या कार्यालयात ते बोलत होते. यावेळी आमदार संकल्प आमोणकर, युरी आलेमाव, रूडॉल्फ फर्नांडिस, एल्टन डिकॉस्टा उपस्थित होते.

यावेळी कामत म्हणाले, 2021-22 च्या अर्थसंकल्पातील 56 टक्के तरतुदी प्रत्यक्षात उतरलेल्याच नाहीत. हा नव्या अर्थसंकल्पात केवळ पाठीमागच्या अर्थसंकल्पातील तरतुदी नव्याने मांडलेल्या आहेत. यात नवीन काहीच नाही. त्यामुळे हा अर्थसंकल्प राज्याला पुढे नेण्याऐवजी मागे नेणारा आहे. हे सरकार पर्यावरणविरोधी असून आम्ही त्यांच्या पर्यावरण विरोधाला नेहमी विरोध करत राहू. अर्थसंकल्पामध्ये तिन्ही लिनियर प्रकल्प रद्द करण्याबाबत कोणतीच तरतूद नाही. शहिदांच्या पत्रादेवी येथील स्मारकासाठी तरतूद करण्यात आली आहे. मात्र, असोळणा आणि कुंकळ्ळी येथील स्मारकाबाबत कोणतीच तरतूद करण्यात आलेली नाही. शिक्षण क्षेत्रातील साधनसुविधांच्या बाबतीतही या अर्थसंकल्पात तरतूद नसल्याची टीका कामत यांनी केली.