डिचोली बाजारातील ‘ते’ वादग्रस्त पत्र्यांचे गाळे हटविण्याचे काम अखेर हाती घेण्यात आले आहे. आज (गुरुवारी) सकाळपासून पोलिस बंदोबस्तात पालिकेच्या कर्मचाऱ्यांनी गाळे हटविण्याची कारवाई सुरू करून सायंकाळपर्यंत पाचहून अधिक गाळे हटविले. रात्री उशिरापर्यंत जेसीबी यंत्राच्या सहकार्याने गाळे हटविण्याचे काम सुरू होते.
या कारवाई सुरू करताना नगराध्यक्ष कुंदन फळारी, नगरसेवक नीलेश टोपले आणि पालिकेचे अभियंता आदी अधिकारी उपस्थित होते. गाळे हटविण्याचे काम सुरळीतपणे सूरू होते. ही कारवाई उद्याही सुरु राहणार असल्याची माहिती मिळाली आहे.
नवीन बाजार संकुल प्रकल्प बांधण्यासाठी पाच वर्षापूर्वी बाजारातील गणपती पूजन मंडपासमोरील गाडे हटविण्यात आले होते. त्या गाडेधारकांची तात्पुरती व्यवस्था म्हणून मासळी मार्केट समोरील मोकळ्या जागेत एका रांगेत पत्र्यांचे गाळे उभारण्यात आले होते.
नवीन प्रकल्प पूर्ण झाल्यानंतर पत्र्यांच्या गाळ्यांत व्यवस्था केलेल्या गाळेधारकांना नवीन प्रकल्पात स्थलांतरीत करण्यात आले, तरीही काहींनी पत्र्याच्या गाळ्यांचा ताबा सोडला नव्हता. या गाळ्यांमध्ये काही भाजीविक्रेते परस्पर आपले सामान ठेवत होते. यावरून दोन महिन्यांपूर्वी झालेल्या पालिका मंडळाच्या बैठकीत गरमागरम चर्चाही झाली होती. हे गाळे हटविण्याचा निर्णयही बैठकीत झाला होता. अखेर आज, उद्या करीत आज (गुरुवारी) कारवाई हाती घेण्यात आली.
आठ गाळ्यांवरील कारवाई लांबणीवर
डिचोली बाजारातील मासळी मार्केट समोर पत्र्यांचे 24 गाळे उभारण्यात आले होते. त्यातील 16 गाळे सध्या काढण्यात येणार आहेत. उर्वरित आठ गाळ्यां विरोधातील कारवाई लांबणीवर पडणार आहे. तांत्रिक कारणामुळे 8 गाळे तूर्तास हटविण्यात येणार नाहीत. तांत्रिक मुद्दा सुटला, की लगेचेच हे गाळे हटविण्यात येणार आहेत. अशी माहिती नगराध्यक्ष कुंदन फळारी यांनी दिली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
