Dharbandora Water Crisis: ...अखेर धुलैय गावाला पाणीपुरवठा सुरू

फोंडा: धारबांदोडा पंचायत क्षेत्रातील धुलैय गावातील लोकांना गेला महिनाभर पिण्याचे पाणी मिळाले नसल्याने येथील महिलांनी ‘गोमन्तक’च्या पत्रकारांसमवेत धारबांदोडा येथे सार्वजनिक बांधकाम खात्याच्या पाणीपुरवठा कार्यालयात जाऊन येथील अधिकाऱ्यांना जाब विचारला.

त्यामुळे अधिकाऱ्यांनी तातडीने धुलैय गावात जाऊन पाण्याच्या पंपाची पाहणी केली. कमी दाबाच्या वीजपुरवठ्यामुळे ही समस्या निर्माण झाली होती. वीज खात्याच्या कर्मचाऱ्यांना बोलावून त्वरित दुरुस्ती केली.

अखेर पंप सुरू झाल्याने प्रत्येकाच्या घरात नळाद्वारे पाणीपुरवठा सुरू झाल्याने स्थानिकांनी समाधान व्यक्त केले. धुलैय गावातील लोकांनी ‘गोमन्तक टीव्ही’चे आभार मानले असून ‘गोमन्तक’मुळे आम्हाला पाणी मिळाले, असे सांगितले.

अनेक अधिकारी अनुपस्थित

धुलैय ग्रामस्थांच्या समस्येची दखल घेऊन ‘गोमन्तक टीव्ही’च्या प्रतिनिधींनी बुधवारी सकाळी १०.३० वाजता धारबांदोडा येथील कार्यालयाला भेट दिली असता, अधिकाऱ्यांच्या बहुतांश खुर्च्या रिकाम्या होत्या. यासंदर्भात विचारले असता, उपस्थित कर्मचाऱ्यांनी मौन बाळगले. शेवटी साहाय्यक अभियंता आल्यानंतर ग्रामस्थांनी कैफियत मांडली आणि आम्हाला पाणी द्या, अशी मागणी केली. अखेर अधिकारी देविदास गावडे यांनी सहकाऱ्यांसोबत धुलैय गावात जाऊन पाण्याची समस्या सोडविली.