Traditional Business: उच्च शिक्षित असून सुद्धा ते सांभाळत आहेत गोवेकरांचा 'पूर्वपार व्यवसाय'

सांगे येथील 'खाजेकार' म्हणून प्रसिद्ध असलेले नार्वेकर कुटुंबीय गेल्या शंभरहून जास्त वर्षे खाजे, लाडू बनवण्याचा व्यवसाय करत आहे. त्यांच्या पुढील पिढीतले अवधूत मंगलदास नार्वेकर हे मागील 35 वर्षापासून हा व्यवसाय यथोचितपणे सांभाळत आहेत. (Traditional Business)

दरम्यानच्या काळात व्यवसायातील अनेक आव्हानांचा त्यांनी सामना केलाय. जत्रोत्सवासाठी लागणारे बुंदीचे लाडू, लग्न- कार्यासाठी लागणारे लाडू तसेच वेगवेगळ्या प्रकारचे खाजे ते तयार करत असून त्यांच्या चविष्ट पदार्थांची चव लोकांच्या जिभेवर कायम रेंगाळत राहिली आहे.

अवधूत नार्वेकर हे आयटीआय मधून डिझेल मेकॅनिकचा अभ्यासक्रम शिकलेले आहेत. उच्चशिक्षित असूनही त्यांनी आपल्या पूर्वजांच्या व्यवसायाकडे कधीच दुर्लक्ष केले नाही. कोरोना महामारीच्या काळातही मोठ्या शिकस्तीने त्यांनी आपला पूर्वपार व्यवसाय न सोडता मोठ्या धीराने या धंद्याला उभारी देण्याचा प्रयत्न केलाय. त्यांच्या चिकाटीमुळेच ते आज नवउद्योजकांसमोर एक आदर्श व्यावसायिक बनले आहेत.

मात्र सध्या या कामासाठी कामगार मिळत नसल्याने त्यांना स्वतःहून सर्व काम करावं लागत आहे. या कष्टाच्या व्यवसायाकडे युवा वर्ग पाठ फिरवत असून दिवसेंदिवस हा व्यवसाय टिकवून ठेवणं कष्टप्रद असल्याचे नार्वेकर सांगतात. दर्जेदार खाजे, लाडू बनवणे हा गोवेकरांचा मूळचा धंदा असून या धंद्यात पुढे जाण्यासाठी सरकारने काही प्रमाणात हातभार लावावा अशी विनंतीही त्यांनी केलीय.