तिसवाडी: प्लास्टर ऑफ पॅरिस (पीओपी) गणेशमूर्ती विक्रीवर बंदी असली राज्यात अनेक ठिकाणी या मूर्तींची उघडरीत्या विक्री केल्या जात असल्याचा विषय आल्यानंतर विक्री करणाऱ्यांवर कारवाई केली जाईल, असे मंत्री आलेक्स सिक्वेरा यांनी सांगितले. तसेच या मूर्ती गोव्यात आत शिरणारच नाही, असे मुख्यमंत्र्यांनी स्पष्ट केले आहे. परंतु ही आश्वासने पूर्वी देखील दिली असून खरोखरच कारवाई केली जाईल, यावरून संभ्रम निर्माण झाला आहे.
पीओपी गणेश मूर्ती ही पर्यावरणासाठी हानिकारक असून त्यांची विक्री करण्यास बंदी घातली होती, परंतु हा आदेश केवळ कागदापूर्ती मर्यादित राहिला आहे. राजधानी पणजीत देखील या मूर्तींची विक्री केली जाते, असे काही गणेशभक्तांनी सांगितले.
मंत्री आलेक्स सिक्वेरा यांनी विधानसभेत जाहीर केले आहे की, या विरोधात प्रदूषण नियंत्रण मंडळ कारवाई करणार आहे. मात्र प्रदूषण नियंत्रण मंडळाकडून उलट काणाडोळा होत असल्याची टीका पर्यावरणप्रेमींकडून होत आहे. मुख्यमंत्री डॉ. प्रमोद सावंत यांनी पीओपीच्या मूर्ती बाहेरून येत असून आपण पोलिस खात्याला आदेश देऊन त्या गोव्याच्या सीमेवर अडवणार असल्याचे सांगितले आहे.
परंतु यापूर्वीच्या ज्या मूर्ती गोव्यात पोचल्या आहेत. तसेच काही गणेश चित्रशाळेत चोरीचुपके पीओपीच्या मूर्ती तयार केल्या जातात त्यावर सरकार काय कारवाई करणार याबाबत सरकारने अद्याप भूमिका स्पष्ट केलेली नाही. त्यासाठी गणेश चित्रशाळा तसेच विक्री केंद्रांची झडती घेणे आवश्‍यक आहे. सरकार हे पाऊल उचलणार का, याबाबत गणेशभक्तांना संशय आहे.
गेल्या वर्षी देखील असेच आश्वासन सरकारने दिले होते, परंतु हजारोच्या संख्येत पीओपी मूर्ती गोव्यात येऊन लोकांनी त्या खरेदीही केल्या, परिणामी विसर्जित केल्यानंतर जलस्रोत प्रदूषित झाले. सरकार खरोखरच गंभीर असेल, तर कागदी घोडे न नाचवता आतापासूनच कडक कारवाई सुरू झाली पाहिजे.
राजेंद्र केरकर, पर्यावरण कार्यकर्ता
पीओपी मूर्तीवर कारवाई करण्याची तयारी तीन महिन्यापूर्वी करण्याची आवश्यकता होती. शेवटच्या क्षणी मूर्ती न मिळाल्यास लोक पीओपी घेणार, निदान पुढील वर्षी ही स्थिती येणार नाही, यासाठी चिकण मातीची मूर्ती घडवणाऱ्यांना प्रोत्साहन देऊन या आदेशाची अंमलबजावणी करावी.
अभिजित प्रभुदेसाई, पर्यावरण कार्यकर्ता
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.