Goa Taxi App : गोवा टॅक्सी ॲपला अजूनही कार व्यावसायिकांचा नकार ; वाहतूक खात्याचा दावा

Goa Taxi App : पणजी, वाहतूक खात्याने गोवा टॅक्सी ॲप पूर्ण क्षमतेने वापरण्यास परवानगी देण्याचे निश्‍चित केले आहे. त्यामुळे प्रवाशांना दिलासा मिळेल, असा खात्याचा दावा असला, तरी पारंपरिक टॅक्सीचालकांनी हे ॲप वापरण्यास ठाम नकार दर्शविला आहे.

वाहतूक खात्याचे साहाय्यक संचालक फ्रान्सिस्को वाझ यांनी सांगितले की, ज्यांना गोवा टॅक्सी ॲपअंतर्गत काम करायचे आहे, त्यांनी वाहतूक खात्याकडे अर्ज करणे आवश्यक आहे.

जेव्हा हे ॲप लॉन्च केले, तेव्हा ४५० पेक्षा कमी नोंदणीकृत टॅक्सी ऑपरेटर होते, म्हणून त्यांना ॲप वापरण्यासाठी अंशत: परवानगी दिली होती. पण आता ४५० टॅक्सी ऑपरेटरचा टप्पा गाठला आहे. त्यामुळे आम्ही त्यांना ॲप पूर्ण क्षमतेने चालवण्याची परवानगी देऊ.

आम्ही इतर टॅक्सीचालकांना या ॲपअंतर्गत काम करण्यास सांगितले; परंतु अनेकांनी नकार दिला, असे वाझ यांनी स्पष्ट केले..

ॲपची गरज नाही!

काळी-पिवळी टॅक्सी असोसिएशनचे अध्यक्ष सुनील नाईक म्हणाले की, काळी-पिवळी टॅक्सी या पॉइंट टू पॉइंट सेवेला राज्य सरकारची मान्यता आहे. आम्ही गेल्या २० वर्षांपासून हे टॅक्सी काऊंटर चालवत आहोत.

करमळी रेल्वे स्थानकावरील प्रवाशांना आम्ही चांगली सेवा देतो. प्रवाशांनाही टॅक्सी भाड्याने घेण्यासाठी कोणत्याही ॲपची आवश्‍यकता भासत नाही. सरकारला हे ॲप टॅक्सीचालकांवर लादायचे असेल तर आम्हाला सरकारी नोकऱ्या द्या आणि या टॅक्सी घ्या, असे ते म्हणाले.

सरकारचा हस्तक्षेप नको!

टुरिस्ट टॅक्सी असोसिएशनचे अध्यक्ष चेतन कामत म्हणाले की, आम्ही कोणत्याही स्थितीत गोवा टॅक्सी ॲपअंतर्गत काम करणार नाही. आम्हाला टॅक्सी व्यवसाय मुक्तपणे करायचा आहे.

अ‍ॅपअंतर्गत आमचे पैसे तिसऱ्या व्यक्तीला द्यायचे आणि मग आमच्या बँक खात्यात पैसे येण्याची वाट पाहायची का? सरकार टॅक्सी व्यवसायात हस्तक्षेप करत आहे, हे योग्य नाही.

या ॲपबद्दल माहिती नसलेल्या वृद्ध व्यक्तींचे काय? ते ॲपअंतर्गत व्यवसाय कसा करतील, असाही प्रश्‍न कामत यांनी केला