कुंकळळी: कुटबण भागात मासेमारी बंदरावर काम करणाऱ्या परप्रांतीय कामगारांना डेंग्यूची लागण झाल्याचे स्पष्ट झाले असून कुटबण भागात मोठ्या प्रमाणात डेंग्यूचा फैलावा झाला असल्याची भीती वर्तविण्यात येत आहे. आत्तापर्यंत अकरा कामगारांना या रोगाची लागण झाल्याचे तपासणीत सिद्ध झाले आहे. काही कामगारांना डेंग्यूची लक्षणे आढळल्याने त्यांच्यावर इस्पितळात उपचार सुरू आहेत.
कुटबण जेटीवरील विविध मच्छीमारी बोटींवर सुमारे चार हजार कामगार काम करतात. या कामगारांना कामावर रुजू होण्यापूर्वी सर्व तपासण्या करणे सक्तीचे आहे. असे असले तरी काही बोटमालक आपल्या कामगाराची तशी तपासणी करीत नाहीत. यापूर्वी कुटबण जेटीवर अशाचप्रकारे डेंग्यूचा फैलाव होऊन दोघांचा मृत्यू झाला होता. आता पुन्हा एकदा डेंग्यू पसरल्यामुळे स्थानिकांत भीतीचे वातावरण पसरले आहे.
कुंकळ्ळी औद्योगिक वसाहतीत काम करणाऱ्या चार परप्रांतीय कामगारांत डेंग्यूची लक्षणे आढळली असल्याचे समजते. बाळ्ळी आरोग्य केंद्राच्या तज्ज्ञ डॉक्टरांनी कुटबण भागात भेट देऊन रक्ताचे नमुने गोळा केले व फवारणीचे काम हाती घेतले आहे. आरोग्य केंद्राच्या अधिकाऱ्यांनी सहाजणांना डेंग्यूची लागण झाल्याचे माहिती दिली , तरी सुमारे बारा डेंग्यूचे रुग्ण असल्याचा दावा स्थानिक करत आहेत.
डेंग्यू रोगाची लक्षणे आढळून आल्यामुळे कुटबण भागात बाळ्ळी आरोग्य केंद्राने तपासणी कार्य सुरू केले आहे. त्याचबरोबर डेंग्यूचा फैलाव रोखण्यासाठी खबरदारीचे उपाय आखण्यात आले असल्याचे आरोग्य केंद्राच्या डॉक्टरांनी सांगितले. आणखी डेंग्यूचे रुग्ण आढळण्याची शक्यता नाकारता येत नाही. प्रत्येक प्रभागात व विशेष करून मच्छीमार बोटींवर काम करणाऱ्या प्रत्येक कामगाराची तपासणी करण्यात येणार असल्याचे अधिकाऱ्यांनी स्पष्ट केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.