Margao: गोमंतकियांनो काळजी घ्या! पावसाचे आगमन होताच दक्षिण गोव्यात मलेरिया, डेंग्यूचे वाढले रुग्ण

मडगाव: पावसाळा सुरू होताच डेंग्यू आणि मलेरिया आजाराने दक्षिण गोव्यात मान वर काढलेली दिसत आहे. आतापर्यंत मलेरियाचे २८ आणि डेंग्यूचे ५१ रुग्ण दक्षिण गोवा जिल्हा इस्पितळात उपचारांसाठी दाखल झाल्याची माहिती समोर आली आहे.

यंदा १५ दिवसांपूर्वीच पावसाने राज्यात हजेरी लावली. यामुळे अनेक ठिकाणी पाणी साचून राहिल्याचे दिसून येत आहे. दोन दिवस मध्येच पावसाने दडी मारल्याने यात डासांची पैदास व्हायला सुरवात झाली असून डेंग्यू, मलेरिया झालेले रुग्ण आता पुढे येऊ लागले आहेत.

दक्षिण गोवा जिल्हा इस्पितळाच्या वैद्यकीय अधीक्षक डॉ. राजेंद्र बोरकर यांनी दिलेल्या माहितीनुसार, गेल्यावर्षी सुमारे ६०० पुरुष आणि ३५१ महिला डेंग्यू रुग्ण इस्पितळात उपचारांसाठी दाखल झाले होते. यंदा, आतापर्यंत ३७ पुरुष आणि १४ महिला डेंग्यू रुग्ण इथे उपचारांसाठी दाखल झाले.

दरम्यान, पावसाने उसंत घेतल्याने साचलेल्या पाण्यात डासांची पैदास वाढू लागली आहे, त्यामुळे नागरिकांनी परिसरात स्वच्छता राखावी, असे आवाहन केले आहे.

२२ पुरुष व ६ महिलांना मलेरिया

डॉ. बोरकर म्हणाले की, गेल्यावर्षी सुमारे २०४ पुरुष आणि २१ महिलांना मलेरियाची लागण झाली होती. यंदा २२ पुरुष आणि ६ महिलांना मलेरिया झाला. हे सर्व रुग्ण इथे इस्पितळात दाखल होऊन वैद्यकीय उपचार घेत होते. वरील प्रकरणांमध्ये, डेंग्यू किंवा मलेरिया झालेले रुग्ण हे जास्त प्रमाणात हे मजूर वर्गातील आहेत.