Harvalem: 'रुद्रेश्‍‍वर देवस्थान'बाबतीत सरकारने तातडीने पावले उचलावीत; 'निवडणूक घ्या' अशी माजी महाजनांची मागणी

Rudreshwar Temple Elections

पणजी : गेली नऊ वर्षे न झालेली हरवळे येथील श्री रुद्रेश्‍‍वर देवस्थानची निवडणूक यंदा तरी व्हावी म्हणून सरकारने तातडीने पावले उचलावीत, अशी मागणी माजी महाजन गुरुदास सावळ यांनी मुख्यमंत्री डॉ. प्रमोद सावंत यांच्याकडे केली आहे.

देवस्थान समितीने तयार केलेली महाजनांची यादी सदोष असल्याचा दावा करून एका महाजनाने नऊ वर्षांपूर्वी उच्च न्यायालयात धाव घेतली होती. सदर देवस्थान भंडारी समाजाचे असल्याचे मानले जाते व राज्‍यभरातील भंडारी बांधव महाजन झाले होते.

मात्र महाजन कायद्यानुसार, ज्या लोकांनी देवस्थानची नोंदणी केली आहे, त्यांचे वारसच महाजन बनू शकतात हा युक्तिवाद उच्च न्यायालयाने मान्य केला होता. तसेच महाजनांच्‍या यादीचा फेरआढावा घेण्यासाठी माजी सत्र न्यायाधीश प्रमोद कामत यांचा एक सदस्यीय लवाद नेमला होता.

दरम्‍यान, गेल्या नऊ वर्षांत हे काम पूर्ण न झाल्याने देवस्थानच्‍या निवडणुका झालेल्या नाहीत. आता पुढील त्रैवार्षिक निवडणूक फेब्रुवारी २०२५ मध्ये होऊ घातली आहे. ती घेता यावी म्हणून‌ ३१ डिसेंबर २०२४ संदर्भ तारीख धरून महाजन यादी तयार करावी लागेल. गेल्या नऊ वर्षांत निवडणूक न झाल्याने अस्थायी समिती कारभार हाताळत आहे. त्यामुळे साखळीचे आमदार या नात्याने मुख्‍यमंत्र्यांनी या प्रकरणात हस्तक्षेप करावा, अशी मागणी सावळ यांनी एका निवेदनाद्वारे केली आहे.