Talpona Jetty: तळपण नदीचे मुख गाळमुक्त करा; मच्छीमारांच्या मागणीकडे अनेक वर्षे दुर्लक्ष

Talpona Jetty

काणकोण: तळपण नदीचे मुख गाळमुक्त करण्याची अनेक वर्षांची मागणी अद्याप धसास लागत नाही. येथील मत्स्य व्यावसायिकांसाठी काणकोण तालुक्यातील एकमेव जेटी तळपण नदीच्या मुखाशी आहे. मात्र, भरतीच्या वेळी मासेमारी बोटी समुद्रात सोडणे व जेटीजवळ आणणे नदीचे मुख गाळाने भरल्याने मत्स्य व्यावसायिकांना शक्य होत नाही. त्यामुळे या नदीचे मुख गाळमुक्त करण्याची गरज आहे.

मच्छीमारी बोटी समुद्रात सोडण्याच्या व मासेमारी करून परत आणण्याच्या मार्गात पाषाणी दगड आहेत. त्यात एक देवाचो फातर म्हणून प्रचलित आहे. या ठिकाणी मासेमारी करून येताना मच्छीमार पकडलेल्या माशांपैकी काही मासे या ठिकाणी देवाला अर्पण करतात.

या ठिकाणी मोठ्या प्रमाणात गाळ साचला आहे. रविवारी याच कातळाजवळ मच्छीमार बोट रूतली व त्याचवेळी मोठी लाट येऊन बोटीवर धडकली आणि बोट माशांसह समुद्रात उलटली. या होडीत दहा मच्छीमार होते. त्यापैकी चार मच्छीमारांना पोहता येत नव्हते. त्यांना स्थानिक मच्छीमारांनी सुरक्षित किनाऱ्यावर आणले.

तळपण जेटीचा विस्तार, दुरुस्ती करण्यासाठी माजी मुख्यमंत्री मनोहर पर्रीकर व तत्कालीन मत्स्योद्योग मंत्र्यांनी पाहणी केली होती, त्यावेळी मुख गाळमुक्त करण्याची मागणी येथील मत्स्य व्यावसायिकांनी लावून धरली होती. मात्र, त्यानंतर तळपण जेटीचा अद्याप उद्धार झाला नाही, अशी येथील मत्स्य व्यावसायिकांची कैफीयत आहे.