सांगे मतदारसंघाला मंत्रिपद द्यावे अशी मागणी; भाजप मंडळाची नाराजी

डिचोली: सांगे मतदारसंघाला यावेळी तरी मंत्रिपद द्यावे अशी मागणी सांगे भाजपने केली आहे. आज मुख्‍यमंत्र्यांसह नऊ जणांचा शपथविधी झाला, मात्र त्‍यात सुभाष फळदेसाई यांचे नाव नसल्याने सांगे भाजप मंडळाने नाराजी व्यक्त केली आहे. दरम्‍यान, पहिल्या टप्प्यात मंत्रिमंडळात डिचोली मतदारसंघाला संधी मिळाली नसल्याने या मतदारसंघातही नाराजी पसरली आहे. सुमारे 22 वर्षांपासून वंचित राहिलेल्या या मतदारसंघाला यावेळी तरी मंत्रिमंडळात स्थान मिळावे अशी मागणी जोर धरू लागली आहे. सांगे मतदारसंघ हा भाजपचा बालेकिल्ला असून पाच वेळा पक्षाचा उमेदवार निवडून आलेला आहे. पण अजूनही हा मतदारसंघ

मंत्रिपदापासून वंचित आहे. यावेळी तरी मंत्रिपद मिळाले पाहिजे असे माजी आमदार वासुदेव मेंग गावकर यांनी सांगितले. सांगे मतदारसंघ भौगोलिकदृष्ट्या बराच मोठा असून अनुसूचित जमातीच्या लोकांचा अधिक भरणा आहे. त्‍यामुळे या मतदारसंघाचा सर्वांगीण विकास होणे अत्यंत गरजेचे आहे व यासाठीच सांगेला मंत्रिपदाची आवश्यकता आहे असे गावकर यांनी सांगितले.

यावेळी जिल्हा पंचायत सदस्य सुरेश केपेकर, राजेश गावकर, वैशाली नाईक व कार्यकर्त्यांची उपस्‍थिती होती. दरम्‍यान, सांगेला मंत्रिपद मिळणार या आशेने आज शपथविधी सोहळ्याला मतदारसंघातील शेकडो भाजप कार्यकर्ते गेले होते. पण आमची घोर निराशा झाली, असे या लोकांनी सांगितले.