बेकरी व्यवसाय गोवेकरांच्या हातात राहावा, असे सरकारला वाटत असेल तर...

मडगाव: बेकरी व्यवसायात (Bakery Business) परप्रांतियांची संख्या मोठी झालेली आहे. अवघे 10 टक्केच गोमंतकीय बेकरी व्यवसायात शिल्लक आहेत. हा व्यवसाय गोवेकरांच्या हातात राहावा, असे सरकारला (Goa Government) वाटत असेल, तर त्याने या पारंपरिक बेकरांना अनुदान द्यावे, अशी मागणी अखिल गोवा बेकर्स ॲण्ड कन्फेक्शनरी असोसिएशनचे अध्यक्ष पीटर फर्नांडिस यांनी केली आहे.

जागतिक बेकर्स दिनानिमित्त शनिवारी येथील होली स्पिरीट चर्चमध्ये कृतज्ञता मासानंतर बोलताना ते म्हणाले की, सहा वर्षांनंतर पाव एक रुपयाने वाढविला आहे, याची नोंद गोवेकरांनी घ्यावी व पदेरांच्या समस्याही समजून घ्याव्यात. या व्यवसायात परप्रांतीय मोठ्या प्रमाणात शिरले आहेत व त्यांनी असंख्य बेकरी उत्पादने सुरू करून त्यावर नियंत्रण मिळविले आहे. त्यांच्या गैरप्रकारांकडे एफडीए व प्रदूषण नियंत्रण महामंडळ दुर्लक्ष करते, असा ठपका त्यांनी ठेवला. त्यामुळे गोवेकरांच्या समस्यांत भर पडली आहे.

लाकडाचे दर वाढले

आता अवघे 10 टक्के गोवेकर या व्यवसायात उरले आहेत. त्यांना सबसिडी मिळत नाही. जळावू लाकडाचे दर हाताबाहेर गेले आहेत. ती सहजपणे मिळत नाहीत व त्यामुळे समस्या वाढतात. प्रदूषण नियंत्रण मंडळ त्यांना गॅस वा डिझेल ओव्हनचा सल्ला देते पण त्याला साधारण अडीच लाख खर्च आहे, तो सरकारने सबसिडी वा प्रोत्साहकाच्या रुपाने दिला, तर त्यांना दिलासा मिळेल व हा व्यवसायही तग धरेल असेही फर्नांडिस म्हणाले.