पेडणे: माहितीहक्क कायद्याखाली मागितलेली माहिती मिळाली नाही म्हणून दिल्लीच्‍या पिता-पुत्राने पेडणे गटविकास कार्यालयात घुसून मोरजीचे पंचायत सचिव सचिन धाऊसकर यांना लाथाबुक्क्यांनी बेदम मारहाण केली. तसेच कार्यालयाच्या केबिनची तोडफोडही केली. ही घटना गुरुवारी संध्याकाळी साडेचारच्‍या सुमारास घडली.
संजय रेलन व मितेश रेलन अशी त्‍यांची नावे आहेत. त्‍यांच्‍यावर गुन्‍हा नोंद करून संध्याकाळी त्यांना रीतसर अटक करण्‍यात आली. मिळालेल्‍या माहितीनुसार, संजय रेलन व मितेश रेलन हे पिता-पुत्र मूळ दिल्लीचे असून सध्‍या शिवोलीत वास्तव्याला आहेत.
संजय रेलन यांनी पेडणे गटविकास कार्यालयात माहितीहक्क कायद्याखाली माहिती मागितली होती व ती मिळविण्यासाठी दोघेही आज सदर कार्यालयात आले होते. पण पेडणे गटविकास अधिकारी निक्षा नाईक या कार्यालयीन कामासाठी धारगळ येथे गेल्या होत्या.
त्‍याचवेळी मोरजीचे पंचायत सचिव सचिन धाऊसकर पेडणे गटविकास कार्यालयात आले होते. त्यांना संशयितांनी माहितीहक्क अर्जाविषयी विचारले. त्यांनी गटविकास अधिकारी कार्यालयात नसल्याचे सांगितल्यावर संशयितांचा पारा चढला व त्यांनी धाऊस्‍कर यांना लाथाबुक्क्यांनी मारण्यास सुरवात केली. त्यात धाऊस्‍कर यांच्‍या डोक्याला व हातापायांना मार लागला. त्‍यानंतर या पिता-पुत्राने गटविकास कार्यालयातील अधिकाऱ्यांच्या केबिनची तोडफोड केली. काचाही फोडल्‍या.
याबाबत पोलिसांना माहिती मिळाल्यावर त्यांनी धाव घेऊन परिस्‍थितीवर नियंत्रण मिळविले. तसेच जखमी सचिव धाऊस्‍कर तसेच संशयितांनाही वैद्यकीय तपासणीसाठी तुये सरकारी इस्पितळात पाठवले. तेथे प्राथमिक उपचार करून सर्वांना म्हापसा जिल्हा रुग्णालयात नेण्‍यात आले. तिघांनाही पेडणे पोलिस ठाण्यात आणल्यावर पुढील कारवाई केली जाणार आहे. दरम्‍यान, मोरजीचे सरपंच पवन मोरजे यांनी या मारहाणीच्‍या प्रकाराबद्दल संताप व्यक्त केला आहे. तर, गोवा फॉरवर्डचे नेते दीपक कळंगुटकर यांनी संशयितांवर कडक कारवाईची मागणी केली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
