CRZ कायदा धाब्यावर बसवून कोलव्यात उभारलेला दिल्लीतील व्यावसायिकाचा बंगला भुईसपाट

कोलवा: सीआरझेड कायद्याचा भंग करून कोलवा समुद्र किनाऱ्याजवळ पवनकुमार अरोरा या दिल्लीतील एका व्यावसायिकाने उभारलेला बंगला आज मंगळवारी बांधकाम हटाव पथकाने भुईसपाट केला. हे बांधकाम विकास प्रतिबंधित क्षेत्रात उभारले गेले असल्याचे नमूद करून गोवा किनारपट्टी प्राधिकरणाने ऑक्टोबर २०२२ मध्ये हे बांधकाम पाडण्याचा आदेश दिला होता.

सासष्टीचे मामलेदार प्रतापराव गावकर यांच्या देखरेखीखाली हे बांधकाम पाडण्यात आले. उपजिल्हाधिकारी कार्यालयातून हे बांधकाम पाडण्याचा आदेश देण्यात आला होता. त्यानुसार ही कारवाई करण्यात आल्याचे गावकर यांनी सांगितले.

या बंगल्याच्या विरोधात कोलवा सिव्हीक फोरमच्या ज्युडिच आल्मेदा यांनी उच्च न्यायालयात तक्रार दाखल केली होती. त्यानंतर न्यायालयाने किनारपट्टी प्राधिकरणाला या प्रकरणावर सुनावणी घेण्यास सांगितले होते.

सुनावणीच्यावेळी हे बांधकाम समुद्राच्या भरती रेषेपासून २०० मीटर अंतरात असल्याचे दिसून आल्यावर ते पाडण्याचा आदेश देण्यात आला होता.