कुजलेल्या अवस्थेत वाघुर्मेत आढळला युवतीचा मृतदेह!

फोंडा: म्हादाई नदीत वाघुर्मे येथे अज्ञात युवतीचा कुजलेल्या स्थितीतील मृतदेह काल संध्याकाळी सापडला. ही आत्महत्या आहे की खून याबाबत सध्या कोणताही माहिती पुढे आली नाही. या प्रकरणामध्या परिसरामध्ये उलट सुलट प्रतिक्रिया व्यक्त केल्या जात आहे.

झाडीत अडकलेल्या स्थितीतील या युवतीच्या अंगावर निळ्या रंगाची जीन पँट तसेच टी शर्ट आहे. फोंडा पोलिसांनी या प्रकरणाचा पंचनामा केला असून शवचिकित्सेसाठी युवतीचा मृतदेह पाठविण्यात आला आहे. आता या अहवालानंतरच युवतीचा मृतदेहाबाबत माहिती मिळेल असे फोंडा पोलिसांनी सांगितले. फोंडा पोलिस स्थानकाच्या हद्दीतील वाघुर्मे येथे महादई नदीत एका अज्ञात युवतीचा कुजलेल्या स्थितीतील मृतदेह सापडल्याने परिसरात खळबळ उडाली आहे.

वाघुर्मे येथे महादयी नदीच्या किनाऱ्यावरील झुडपात हा मृतदेह अडकला होता. संध्याकाळी येथील काही लोक मासेमारीसाठी गळ टाकण्यास गेले असता मृतदेह कुजल्यामुळे दुर्गंधी आल्याने त्यांनी झुडपात पाहिले असता झुडपात अडकलेला मृतदेह त्यांना दिसला त्यानंतर लगेच फोंडा पोलिसांना कळवल्यानंतर पोलिसांनी घटनास्थळी धाव घेऊन मृतदेह शवचिकित्सेसाठी बांबोळी इस्पितळात पाठवला. नदीकिनारी असलेल्या झुडपात मृतदेह अडकला नसता, तर वाहत मांडवी नदीला मिळाला असता.

मयत युवतीची ओळख अद्याप पटलेली नाही. मृतदेह पाच ते सात दिवसांचा असावा असा कयास वर्तवण्यात येत आहे. फोंडा तसेच लगतच्या पोलिस स्थानकाच्या हद्दीत एखादी युवती बेपत्ता असल्याची तक्रारही नोंद झालेली नाही. त्यामुळे मृतदेहाची ओळख पटवण्याचे आव्हान पोलिसांसमोर ठाकले आहे. फोंडा पोलिस स्थानकाचे उपअधीक्षक नेल्सन अल्बुकर्क यांच्या मार्गदर्शनाखाली पोलिस निरीक्षक मोहन गावडे अधिक तपास करीत आहेत.

पेहरावावरून विद्यार्थिनी असल्याचा संशय

मयत युवतीचे वय अंदाजे वीस ते बावीस वर्षांचे आहे. मात्र, चेहरा ओळखणे शक्य नाही. पेहरावावरून ही युवती विद्यार्थिनी असावी असाही संशय व्यक्त करण्यात येत आहे. मात्र, या युवतीने आत्महत्या केली की तिला ठार मारले याबाबत उलटसुलट प्रतिक्रिया व्यक्त होत आहे. अलीकडच्या काळात गुन्हे वाढल्याने नेमका प्रकार काय याबाबत अधिकच संभ्रम निर्माण झाला आहे. दरम्यान, युवतीचा कुजलेल्या स्थितीत मृतदेह आढळून आल्याने परिसरात चिंता व्यक्त होत आहे.