मडगावात अनोळखी व्यक्तीच्या खूनामुळे खळबळ

मडगाव : मडगाव येथील हॉटेल रविराजनजिक पार्क करुन ठेवलेल्या एका पिकअप गाडीत मृतदेह आढळला आहे. हा मृतदेह कुणीतरी भिकारी किंवा कामगारांचा असावा असा प्राथमिक अंदाज आहे. मडगावात अशा प्रकारे मृतदेह सापडल्याने परिसरात मात्र खळबळ माजली आहे. (Deadbody of unknown man found in Madgaon Goa)

शनिवारी सकाळी ही घटना उघडकीस आली असून हत्या झालेल्या व्यक्तीला दुसऱ्या ठिकाणी भोसकून टाकले असल्याचा अंदाज व्यक्त करण्यात आला आहे. जखमी अवस्थेत तो चालत या हॉटेलपर्यंत पोहोचून नंतर त्याने जवळ पार्क केलेल्या जीपमध्ये आसरा घेतला. तिथेच तो गतप्राण झाला असावा असा अंदाज पोलीस व्यक्त करीत आहेत. या प्रकरणी तपास सुरू करण्यात आला आहे.

दुसरीकडे सांजाव साजरा करण्यासाठी विहिरीत मारलेली उडी डोंगरी नावेली येथील आशिष रॉड्रिग्स या 19 वर्षीय युवकाच्या जीवावर बेतली. या धाडसात त्याचा प्राण गेला. ही दुर्घटना शुक्रवारी दुपारी 4 च्या सुमारास घडली आहे.

डोंगरी नावेली येथे काही युवक सांजाव साजरा करण्यासाठी विहिरीवर आले. या युवकांबरोबर आशिषनेही विहिरीत उडी घेतली. पण तो वर आलाच नसल्याचे समोर आले. शेवटी अग्निशमन दलाच्या जवानांच्या मदतीने त्याचा मृतदेह पाण्यातून वर काढण्यात आला.