नदीत उडी घेतलेल्या इसमाचा मृतदेह अखेर सापडला

म्हापसा : म्हापशाजवळील मयडे गावात नदीत उडी घेतलेल्या व्यक्तीचा मृतदेह अखेर सापडला आहे. दिगंबर धोंड असं मृत व्यक्तीचं नाव असून काल मंगळवारी दुपारी त्यांनी नदीत उडी घेतल्याची माहिती आहे. आज सकाळी त्यांचा मृतदेह उडी घेतलेल्या ठिकाणापासून जवळच असलेल्या धरणात अडकलेला सापडला आहे. (Deadbody Found in Mayade River News Updates)

नास्नोळा गावातील राहणाऱ्या दिगंबर धोंड या 50 वर्षीय व्यक्तीने काल मंगळवारी मयडे गावातील नदीत उडी घेतली होती. आपलं सामान नदीकिनारी ठेवत त्यांनी नदीमध्ये उडी टाकली होती. काल दुपारपासून शोधकार्य सुरु होतं, मात्र त्यांचा काहीच ठावठिकाणा लागला नव्हता. मात्र आज बुधवारी सकाळी उडी घेतलेल्या पुलापासून जवळच असलेल्या धरणात त्यांचा मृतदेह अडकलेला आढळला आहे.

दरम्यान इसमाने नदीत उडी घेतल्याची माहिती मिळताच म्हापसा पोलिसांनी घटनास्थळी धाव घेतली होती. अग्निशमन दलाने स्थानिकांच्या साहाय्याने व्यक्तीचा शोध सुरु केला होता. मात्र काल अंधार झाल्याने शोधकार्य थांबवण्यात आलं होतं. आज बुधवारी सकाळी त्याचा मृतदेह धरणाजवळ आढळला असून उत्तरीय तपासणीसाठी पाठवण्यात आला आहे. या इसमाने आत्महत्या केली की हा घातपात आहे याचा तपास म्हापसा पोलिसांनी सुरु केला आहे.