Arambol: हरमल किनाऱ्यावर आढळला मृत डॉल्फिन

हरमल येथील किनाऱ्यावर ''डॉल्फिन'' मासा मृतावस्थेत आढळला. पणजीतील वन्य प्राणी तात्पुरता निवारा केंद्राचे कर्मचारी आणि ‘दृष्टी लाईफ सेव्हर’ संस्थेच्या कर्मचाऱ्यांनी त्याचे दफन केले. शनिवारी संध्याकाळी चारच्या सुमारास 12 फूट लांबीचा डॉल्फिन वाहून हरमल किनाऱ्यावर आला होता.

हा डॉल्फिन किमान चार दिवसांपूर्वी मृत पावल्याचा अंदाज वन्य प्राणी तात्पुरता निवारा केंद्राचे कर्मचारी ज्ञानेश्वर टाककर आणि मेलविन डिसिल्वा यांनी व्यक्त केला. या डॉल्फिनचे आयुर्मान 10 ते 12 वर्ष असावे.

यावेळी ‘दृष्टी’चे कर्मचारी करण तांडेल व इतर सहकाऱ्यांनी मदत केली. निर्जनस्थळी नेऊन डॉल्फिनला मूठमाती दिली. हरमलचे सरपंच बर्नार्ड फर्नांडिस यांनी याकामी सहकार्य केले. डॉल्फिन मासा पाहण्यासाठी पर्यटकांनी मोठी गर्दी केली होती.