म्हापसा: म्हापसा पालिका क्षेत्रातील सुमारे 41 धोकादायक झाडे कापण्याची आवश्यकता आहे, तसेच अन्य 55 झाडांच्या काही फांद्या छाटण्याची गरज आहे. हे काम पावसाळा सुरू होण्यापूर्वीच पूर्ण केले जाईल, अशी माहिती आमदार ज्योशुआ डिसोझा यांनी दिली.
म्हापसा शहरातील मॉन्सूनपूर्व कामांसंदर्भात आमदार डिसोझा यांनी म्हापसा पालिकेत विविध शासकीय खात्यांच्या प्रतिनिधींसोबत आढावा बैठक घेतली. शहरातील धोकादायक झाडे हटवण्यासोबतच जलस्रोत खात्याच्या अखत्यारीत येणाऱ्या पालिका क्षेत्रातील प्रमुख सात नाल्यांची साफसफाईही वेळेच्या आत एका एजन्सीमार्फत केली जाणार आहे, असेही त्यांनी यावेळी स्पष्ट केले.
या बैठकीला नगराध्यक्ष शुभांगी वायंगणकर, मुख्याधिकारी सीताराम सावळ, जलस्रोत खाते, सार्वजनिक बांधकाम खाते, आरोग्य खाते, वीज खाते, राष्ट्रीय महामार्ग, उपजिल्हाधिकारी कार्यालय आदींचे अधिकारी उपस्थित होते. तसेच उपनगराध्यक्ष शेखर बेनकर, नगरसेवक सुशांत हरमलकर, प्रकाश भिवशेट, प्रिया मिशाळ, बार्बरा कारास्को, साईनाथ राऊळ, तारक आरोलकर हेही हजर होते.
सर्व नगरसेवकांना त्यांच्या प्रभागांतील अशा प्रकारच्या धोकादायक झाडांची माहिती देण्याची विनंती करण्यात आली आहे, जेणेकरून उपजिल्हाधिकारी कार्यालयाकडून त्यासंदर्भात संयुक्त पाहणी करून अशा धोकादायक झाडांसंदर्भातील अंतिम यादी सार्वजनिक बांधकाम खात्याकडे सुपूर्द केली जाईल. त्यानंतर ही धोकादायक झाडे पावसापूर्वी हटवण्यात येतील, अशी माहिती आमदार डिसोझा यांनी दिली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
