Dangerous Tree: रस्ते अपघात रोखण्यासाठी महामार्गालगतची धोकादायक झाडे हटवावीत; काँग्रेस शिष्टमंडळाची मागणी

Dangerous Tree: काही दिवसांपूर्वी नावेली येथे महामार्गावर चालत्या वाहनावर झाडाची फांदी कोसळून दुचाकीस्वार महिलेचा मृत्यू झाल्याची धक्कादायक घटना घडली होती. यानंतर महामार्गालगत असलेली धोकादायक झाडे हटवावीत, अशी मागणी जोर धरू लागली आहे.

यासंदर्भात काँग्रेस पक्षाने महामार्ग आणि रस्त्याच्या कडेला असलेली धोकादायक झाडे तोडण्यासाठी यंत्रणा उभारण्याचे आवाहन जिल्हा अधिकाऱ्यांना केले आहे.

जिल्हाधिकारी कार्यालयात अतिरिक्त जिल्हाधिकारी दिपक देसाई यांच्या अध्यक्षतेखाली झालेल्या आपत्ती व्यवस्थापन प्राधिकरणाची बैठक पार पडली. बैठकीला दक्षिण गोवा जिल्हा काँग्रेसचे प्रमुख सॅव्हियो डिसिल्वा, एव्हरसन वेल्स आणि रीबेलो यांच्या काँग्रेसच्या शिष्टमंडळाने हजेरी लावली होती.

रस्ते अपघात कमी करण्यासाठी धोकादायक झाडे हटवणे गरजेचे आहे. महामार्गालगतच्या झाडांवर लक्ष ठेवण्यासाठी तज्ज्ञांची टीम स्थापन करण्याच्या जिल्हाधिकाऱ्यांच्या निर्णयाचे स्वागत करून काँग्रेसने सरपंचांनाही पॅनेलवर घ्यावे, अशी मागणी केली आहे.

यावेळी पावसाळ्यातच नव्हे तर वेळोवेळी झाडे छाटली जावीत किंवा तोडली जावीत यासाठी अधिकाऱ्यांनी यंत्रणा उभारावी अशी इच्छा काँग्रेसच्या शिष्टमंडळाने व्यक्त केली आहे.