Goa Fire News: भाटलेत गोदामाला आग; फर्निचर साहित्याचे नुकसान

Goa Fire News:

भाटलेतील टायनी टॉट्स स्कूलपासून जवळच असलेल्या चर्चच्या मागील सोसायटीतील बंद गोदामाला आग लागल्याची घटना घडली. शनिवारी दुपारी 12 च्या सुमारास या बंद गोदामातून धूर येऊ लागल्याचे निदर्शनास येताच स्थानिकांनी घटनास्थळी गर्दी केली.

गोदाम बंद असल्याने नेमका प्रकार काय हे समजत नव्हते. मात्र, स्थानिकांनी घटनेचे गांभीर्य ओळखून अग्निशामक दलाला घटनास्थळी पाचारण केले.

पणजी येथील अग्निशामक दलाच्या जवानांंनी स्थानिकांच्या मदतीने गोदाम उघडून आगीवर नियंत्रण मिळविल्याने मोठा अनर्थ टळला. हे गोदाम फर्निचर बनवणाऱ्या एका दुकानदाराचे असून यामध्ये फर्निचरसाठी वापरण्यात येणाऱ्या वस्तू असल्याची माहिती मिळाली आहे.

या गोदामामध्ये देवाजवळ दिवाबत्ती केली असून कदाचित उंदरामुळे दिव्यातील वात खाली पडून आग लागली असावी, असा अंदाज वर्तविला जात आहे.

गोदाम बंद असल्याने आग बाहेर पसरली नसून आगीत कोणतीही जीवितहानी झाली नसल्याचे सांगण्यात आले. मात्र, फर्निचरच्या साहित्याचे किती नुकसान झाले, हे पंचनामा झाल्यावरच समजू शकेल, असे अग्निशमन दलाकडून सांगण्यात आले.