Cylinder Blast: कारेमड्डीत घरगुती सिलिंडरचा स्फोट! साडेतीन लाखांचे नुकसान

Cylinder Blast in Curchorem: कारेमड्डी कुडचडे येथील जामा मशिदजवळील इम्तिहाज सरमादी यांच्या घरातील सिलेंडरचा स्फोट झाला. यामध्ये किचन पूर्णपणे जळाले असून एक व्यक्ती जखमी झाली आहे. या घटनेत साडेतीन लाखांचे नुकसान झाले.

माहितीनुसार, इम्तिहाज यांच्या घरी काही कार्यक्रमानिमित्त मोठ्या प्रमाणावर स्वयंपाकाचे काम सुरू होते. यावेळी एक सिलेंडर लिक झाला. त्याचदारम्यान बाजूलाच दुसऱ्या शेगडीवर जेवण शिजत होते. त्यामुळे लिक झालेल्या सिलेंडरने पेट घेतली.

ही आग इतकी भीषण होती की यामध्ये संपूर्ण किचन जळाले. दरम्यान, सरमादी यांच्या घरी आलेल्या पाहुण्यांपैकी स्वयंपाकघरात मदतीला म्हणून थांबलेली मुलगी जखमी झाली.

या आगीत किचनमधील डायनिंग टेबल, फ्रीज, कपाट असे सर्व साहित्य जळून खाक झाले. यामध्ये सुमारे साडेतीन लाखांचे आर्थिक नुकसान झाले आहे.