Goa Crime: बंद खोलीत आढळला उत्तर प्रदेशच्या तरुणाचा मृतदेह, कुंकळ्ळीत उडाली खळबळ; पोलिसांनी नाकारला घातपाताचा संशय

मडगाव: कोट्टामळ, कुंकळ्ळी येथे एका घरात ३५ वर्षीय इसम मृत अवस्थेत सापडला. मोहम्मद आतिक हुसेन असे मयताचे नाव असून तो मूळ उत्तर प्रदेश राज्यातील आहे. शवविच्छेदन अहवालानुसार फुफ्फुसातील रक्तवाहिनीत अडथळा हे मृत्यूचे कारण असल्याचे स्पष्ट झाले आहे. कुंकळ्ळी पोलिसांनी ही घटना अनैसर्गिक मृत्यू म्हणून नोंदवून घेतली आहे. उपनिरीक्षक किशोर वेळीप पुढील तपास करीत आहेत.

पोलिस चौकशीत असे निष्पन्न झाले की, २८ एप्रिल रोजी मोहम्मद याला तीव्र डोकेदुखी व उलट्यांचा त्रास झाल्याने बाळ्ळी प्राथमिक आरोग्य केंद्रात दाखल करण्यात आले होते. प्राथमिक उपचारानंतर त्याला डिस्चार्ज देण्यात आला होता. मात्र, दुसऱ्याच दिवशी २९ एप्रिल रोजी सायंकाळी साडेसात वाजण्याच्या सुमारास त्याचा भाऊ मोहम्मद सिद्दीक खोलीवर आला असता दार आतून बंद असल्याचे दिसले. खिडकीतून पाहिले असता मोहम्मद आतिक निपचित पडलेला आढळला. त्यानंतर शेजाऱ्यांच्या मदतीने दरवाजा तोडून त्याला बाळ्ळी प्राथमिक आरोग्य केंद्रात नेण्यात आले; मात्र तेथे डॉक्टरांनी त्याला मृत घोषित केले. पोलिसांनी घातपाताचा संशय नाकारला असून, शवचिकित्सेनंतर मृतदेह कुटुंबीयांच्या ताब्यात देण्यात आला.