Cuchelim Comunidade Land Scam: पालिका कर्मचाऱ्यासह दोघे गजाआड; कुचेली कोमुनिदाद जमीन घोटाळ्याप्रकरणी सहा जणांवर गुन्हा

म्हापसा: कुचेली कोमुनिदाद मालकीच्या जागेत भूखंड पाडून परस्पर त्यांची विक्री केल्याप्रकरणी म्हापसा पोलिसांनी एका पालिका कर्मचाऱ्यासह कोमुनिदाद सदस्य मिळून एकूण सहा जणांविरोधात गुन्हा नोंद केला.

याप्रकरणी रमेश राव (कुचेली) आणि शकील शेख (रा. करासवाडा) या दोघांना बुधवारी (ता.२०) सायंकाळी अटक केली. एकूण ३८.४९ लाखांचा हा फसवणुकीचा प्रकार आहे. अटक (Arrested) करण्यात आलेला रमेश राव हा म्हापसा पालिकेत पर्यवेक्षक म्हणून कामाला आहे. खडपावाडा-कुचेली येथील सरकारने (Government) संपादित केलेल्या जागेत अतिक्रमण करून उभारलेली ३६ घरे १२ नोव्हेंबरला जमीनदोस्त केली होती.

प्रत्‍येकाकडून 5 ते 9 लाख रुपये उकळले

100 ते 150 चौ. मी. भूखंडासाठी या लोकांकडून सूत्रधारांनी सुमारे 5 ते 9 लाख रुपये घेतल्याचा दावा वरील जागेत घर बांधून वास्तव्य करणाऱ्यांनी लोकांनी केला आहे. जागा खरेदी केल्यानंतर, भाटकाराकडे तसेच संबंधितांकडे सर्व सोपस्कार कायदेशीर करून जागा मिळवून देण्याचे आश्‍‍वासनही संबंधित भोगवटादारांना काही ठगसेनांनी दिले होते.

आता बार्देश उपजिल्हाधिकाऱ्यांनी शासकीय जागेत अतिक्रमण केलेल्यांना जागा खाली करण्याच्‍या नोटिसा काढल्याने, या लोकांना भूखंड पाडून जमिनींचा आर्थिक व्यवहार केलेल्यांचे दाबे सध्या दणाणले आहेत.