वाळवंटी नदीत आंघोळीसाठी युवकांची गर्दी

पर्ये: उकाडा असह्य होत असल्याने केरी, मोर्ले भागातून वाहणाऱ्या वाळवंटी नदीच्या पात्रात आंघोळीसाठी राज्याच्या विविध भागांतील तरुणांची मोठी गर्दी उसळलेली पाहायला मिळते. गटागटाने येणारे यातील बरेच तरुण दारूच्या नशेत नदी डोहात आंघोळ करताना दिसतात. असे दारूच्या नशेत नदी डोहात पोहणाऱ्यांना जीवघेणे होऊ शकते.

काही पोहायला न येणारेही पाण्यात डुबकी मारत असतात. वाळवंटीचे बरेच डोह खोल असून त्यात बुडण्याची भीतीही असल्याचे स्थानिकांकडून सांगितले जाते. दरम्यान, दोन दिवसांपूर्वी दूधसागर नदी पात्रात एक युवक बुडून मृत्युमुखी पडल्याची घटना ताजी असताना वाळवंटी नदीत असे प्रकार होऊ शकतात, त्यामुळे संबंधित यंत्रणेने याकडे लक्ष वेधून असे प्रकार रोखावेत, अशी मागणी होत आहे.

वाळवंटी नदीचे गोड्या पाण्याचे पात्रात चांगले आणि स्वच्छ असल्याने स्थानिक युवक व गोव्याच्या विविध भागांतील तरुणांची गर्दी असते. शनिवार , रविवारी किंवा सार्वजनिक सुट्टीच्या दिवशी इथले नदी पात्र गजबजून गेलेली पाहायला मिळतात.

केरीतील कळस कोण, हडडीचो कणो, उभो गुणो, पेळावदो, वेलची कोण, चिंचमळा आदी ठिकाणी मोठ्या प्रमाणात पर्यटक आंघोळीसाठी येत असतात.