गोव्यात औद्योगिक गुंतवणूकदारांसाठी पोषक वातावरण निर्माण करा; उद्योजकांच्या प्रमुख संघटनांची मागणी

मडगाव : गोव्यातील मंत्रिमंडळ शपथविधीसाठी प्रधानमंत्री नरेंद्र मोदी हे उद्या गोव्यात येत असल्याचा पार्श्वभूमीवर आज गोव्यातील उद्योजकांच्या प्रमुख संघटनांनी प्रसिद्धीस दिलेल्या संयुक्त पत्रकात गोव्यात औद्योगिक गुंतवणूकदारांसाठी पोषक वातावरण तयार करा आणि उद्योगांशी संबंधित असलेल्या महामंडळाच्या अध्यक्षपदी राजकारण्यांची नियुक्ती न करता अनुभवी व्यावसायिकांची नेमणूक करा अशी कळकळीची विनंती केली आहे. (Create a Healthy environment for industrial investors in Goa)

गोवा चेंबर ऑफ कॉमर्स, गोवा उद्योजक संघटना, क्रेडाय आणि व्हीआयए या चार प्रमुख उद्योजक संघटनांनी हे संयुक्त निवेदन दिले आहे. मुख्यमंत्री प्रमोद सावंत (Chief Minister Pramod Sawant) हे उद्योजकांचे म्हणणे आस्थापूर्वक ऐकून त्यावर तोडगा काढण्याचा प्रयत्न करतात, त्याबद्दल त्यांचे आभार मानले. तसेच गोव्यात जास्तीत जास्त लोकांनी गुंतवणूक करावी यासाठी अजून बरेच काही करण्याचे बाकी आहे याकडे त्यांनी प्रधानमंत्र्यांचे (Prime Minister Narendra Modi) लक्ष वेधण्याचा प्रयत्न केला आहे.

यासाठी प्रशासनात पारदर्शकता आणण्याबरोबरच भ्रष्टाचार पूर्णपणे निपटून काढण्याची गरज असून उद्योगांना जलद गतीने परवाने आणि अन्य मंजुऱ्या देण्याची गरज व्यक्त केली आहे. ना ना तरेच्या तपासण्या आणि वार्षिक नूतनीकरण यासारख्या किचकट पद्धतीतून उद्योगांना मुक्त करण्याची गरज त्यांनी व्यक्त केली आहे. परवाना आणि मंजुरी प्रक्रिया जलद करण्यासाठी वाटल्यास एखाद्या व्यावसायिक एजन्सीचे सहकार्य घ्यावे अशी सूचना केली आहे.

उद्योगांशी निगडित असलेल्या महामंडळाच्या अध्यक्षपदी राजकीय व्यक्तीची नेमणूक करण्याऐवजी अनुभव असलेल्या एखाद्या व्यावसायिकाची नेमणूक करावी. जर राजकीय व्यक्तीची नेमणूक केलीच तर तिचा संबंद रोजच्या व्यवहारात न ठेवता केवळ धोरणात्मक निर्णय घेण्यापूरता सीमित ठेवावा अशी मागणी केली आहे.

सध्या राज्याची आर्थिक स्थिती पाहता उद्योजक आपल्यासाठी कुठल्याही सवलती मागत नाहीत. मात्र गोव्यात उद्योजकांना भ्रष्टाचारमुक्त (Corruption) वातावरणात काम करण्यासारखे वातावरण निर्माण करावे आणि प्रत्येक कामासाठी ठराविक मुदत ठरवावी आणि त्या कालमर्यादेत ते काम पूर्ण व्हावे अशी पद्धती तयार करावी अशी मागणी या संघटनांनी केली आहे.