COVID-19 in Goa: मंत्री विश्वजित राणे म्हणतात, 'घाबरू नका, काळजी घेतली तर कोरोनाचे संकट टळेल...'

COVID-19 sub-variant JN.1 in Goa: राज्यात पुन्हा एकदा कोरोनाने डोके वर काढले आहे. त्यातच कोरोनाच्या जेएन-1 या नव्या व्हेरीयंटमुळे चिंतेत आणखीच भर पडली आहे. राज्यातील कोरोनाचे वाढते रुग्ण पाहता सरकारने खबरदारीच्या उपाययोजना करण्यास सुरुवात केली आहे.

याबाबत आरोग्यमंत्री विश्वजित राणे म्हणाले की, 'ज्यावेळी कोविड-19 चे संकट राज्यावर होते तेव्हा आपण सर्वांनी नियमांचे पालन करत योग्य ती खबरदारी घेतली होती. त्यामुळे आपण त्या परिस्थितीमधून सुखरूप बाहेर पडलो. आता कोरोनाच्या या नव्या संकटाला परतवून लावण्यासाठी देखील आपल्याला खबरदारी घेणे अत्यंत आवश्यक आहे.' पणजीत आयोजित केलेल्या भाजपच्या कार्यकारिणी बैठकीमध्ये ते बोलत होते.

ते पुढे म्हणाले की, सध्या राज्यात कोरोनाचे नवे रुग्ण सापडत असले तरीदेखील कुणीही घाबरून जाऊ नये. योग्य ती खबरदारी घेतल्यास रुग्णसंख्या वाढीला आळा घालता येऊ शकतो. याबाबत मी आरोग्य खात्याला देखील सूचना दिल्या आहेत. त्याप्रमाणेच प्रत्येक नागरिकाने या सुचनांचे आणि नियमांचे पालन करणे आवश्यक आहे.

डिसेंबर महिन्यात कोरोनाचे रुग्ण का वाढतात?

वर्षाअखेरीस राज्यात पर्यटकांची संख्या मोठ्या प्रमाणात वाढते. ख्रिसमस, नवीन वर्षाचे स्वागत, सनबर्न तसेच विविध संगीत कार्यक्रमांमुळे लाखों पर्यटक याकाळात गोव्यात असतात. अफाट गर्दीमुळे आजारांचे संक्रमण वाढत असून यामुळे कोरोनाचे संक्रमणही झपाट्याने पसरते.