Velsao Railway Issue : वेळसाववासीयांना दिलासा, सहा घरे वाचणार

Velsao Railway Issue : रेल्वेने पूर्वेकडील दुसरा ट्रॅक हलवून सुमारे सहा घरे वाचविण्याचा निर्णय घेतला आहे, अशी माहिती कुठ्ठाळीचे आमदार आंतोन वाझ यांनी दिली. या निर्णयामुळे येथील रहिवाशांना दिलासा मिळणार असल्याचे वास म्हणाले.

रेल्वे विकास निगम लिमिटेड आणि वेळसाव ग्रामस्थांमध्ये रेल्वे दुहेरी मार्गावरून शितयुद्ध चालू आहे. रेल्वे वेळसाव गावात अतिक्रमण करून आपलीच वडीलोपार्जित जागा रेल्वे दुपदरीकरणासाठी जागा बळकावण्याचा प्रयत्न करीत असल्याचे येथील ग्रामस्थांचे म्हणणे आहे.

वडीलोपार्जित जागा कोणत्याही परिस्थितीत रेल्वेच्या घशात देणार नाही, असा पवित्रा या लोकांनी घेतला आहे. दरम्यान रेल्वे दुपदरीकरण प्रकरणी राजकारण न करता सामंजस्याने तोडगा काढण्याची गरज असल्याचे कुठ्ठाळीचे आमदार आंतोन वाझ यांनी एका कार्यक्रमात सांगितले होते.

दरम्यान, कुठ्ठाळीचे आमदार आंतोन वाझ यांनी आज दुपारी दक्षिण पश्चिम रेल्वे प्राधिकरण आणि कासावली पंचायत मंडळासह वेळसाव आणि कासावलीच्या लोकांसाठी प्रस्तावित अंडरपास जो कीत्येक वर्षापासून खितपत पडला आहे. अशा विविध साईट्सची पाहणी केली.

आक्रमक भूमिका

रेल्वे विकास निगमने आमची पारंपरिक वाट बंद केली आहे. आमच्या खासगी जमिनीत बांधकामाचे साहित्य ठेवले. कोणतीही परवानगी न घेता ते काम करीत आहेत. तेथील खासगी जमिनीमध्ये त्यांचे अतिक्रमण सुरू आहे, असा आरोप आल्विलो दोरादो रॉड्रिग्ज यांनी केला होता. त्यांच्यासह इतर ग्रासम्थांनीही यासंदर्भात आक्रमक भूमिका घेतला होती.