फेस्‍ताच्‍या सोपो करातून आलेली 17.50 लाख रुपयांची रक्‍कम पालिकेच्‍या तिजोरीत न भरता 17.50 परस्‍पर आपल्‍या खात्‍यात जमा करण्‍याचा आरोप असलेला मडगाव पालिकेचा कनिष्‍ठ कारकून योगेश शेटकर याच्‍या विरोधात शेवटी मडगाव पालिकेने पोलिसात तक्रार दाखल केली असून चोरी आणि अफरातफरीच्‍या आरोपाखाली त्‍याच्‍या विरोधात गुन्‍हा नोंद करावा अशी मागणी केली आहे.
मडगाव पालिकेचे मुख्‍याधिकारी गौरीश शंखवाळकर यांनी आज मडगाव पोलिसात ही तक्रार दिली. शंखवाळकर यांच्‍याशी संपर्क साधला असता त्‍यांनी या बातमीला दुजोरा दिला. मडगावचे नगराध्‍यक्ष दामोदर शिराेडकर यांनीही ही गोष्‍ट मान्‍य केली. अफरातफर झालेली रक्‍कम त्‍वरित पालिका तिजोरीत जमा व्‍हावी ही एकमेव इच्‍छा असल्‍याचे त्‍यांनी सांगितले.
तब्‍बल 20 दिवसांच्‍या कालावधीनंतर मडगाव पालिकेकडून ही तक्रार नोंदविण्‍यात आली आहे. या कारकुनाच्‍या विरोधात तक्रार नोंदवावी की नाही यासाठी पालिकेने कायदेशीर सल्‍ला मागितला होता. हा कायदेशीर सल्‍ला दिल्‍यानंतर ही तक्रार नोंदविण्‍यात आली. मागचे काही दिवस ही तक्रार नोंदविण्‍यास चालढकल केली जात असल्‍यामुळे पालिकेवर स्‍थानिकांकडून टीका होऊ लागली होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.