कोलव्यात बांधकाम कचरा शेतात टाकल्याची तक्रार

फातोर्डा : कोलवा पंचायत क्षेत्रात असलेल्या शेतामध्ये बांधकाम प्रकल्पाचा टाकाऊ कचरा अज्ञाताकडून आणून टाकण्यात येत असल्याबद्दल स्थानिकांनी कोलवा पंचायतीकडे तक्रार दाखल केली आहे. हा टाकलेला टाकाऊ कचरा शेतीला मारक ठरत आहे. या बरोबरच पर्यावरणाचाही हानी होत असल्याचे या तक्रारीत नमूद करण्यात आले आहे.

ही जमीन शेतीची असल्याने बांधकाम प्रकल्पाचा कचरा या ठिकाणी आणून टाकल्याने पुन्हा या जागेवर शेतीची मशागत होणार नाही. या विषयीची गंभीर दाखल घेऊन पंचायतीने बांधकाम प्रकल्पाचा कचरा आणून टाकणाऱ्यांवर कडक कारवाई करावी, अशी मागणी या तक्रारीत करण्यात आली आहे. बांधकाम प्रकल्पाचा हा कचरा कोलवा पंचायत परिसरातील गोल्डन क्राऊन बीच रिसॉर्ट जवळ असलेल्या शेतामध्ये टाकला आहे.