Colvale Jail Goa: कोलवाळ कारागृहात पुन्हा राडा; एका कैद्याने दुसऱ्याच्या डोळ्यात खुपसला पेन

म्हापसा : कोलवाळ मध्यवर्ती कारागृह पुन्हा एकदा कैद्यांमध्ये राडा झाला असून एका कैद्याने दुसऱ्या कैद्याच्या डोळ्यात पेन खुपसून हल्ला केल्याची धक्कादायक घटना सोमवारी रात्री उशिरा उघडकीस आली.

या हल्ल्यात कैदी अझिज आसिफ हा गंभीर जखमी झाला. हल्लेखोराने आपल्यावर कशासाठी हल्ला केला हे आपणास माहिती नाही. मी झोपलेलो असताना अचानक पेनाच्या साहाय्याने संशयिताने माझ्यावर हल्ला चढविला असे, जखमी अझिजने सांगितले.

या हल्ल्यात त्याच्या डाव्या डोळ्याला व चेहऱ्यावर दुखापत झाली आहे. त्याला म्हापसा येथील जिल्हा इस्पितळात उपचारासाठी आणले असता, माध्यमांनी त्यांना वाटेत गाठून त्याला वरील घटनेबाबत विचारले. त्यावर अझिजने ही माहिती दिली.

दरम्यान, कोलवाळ कारागृहात वारंवार अशा घटना घडत असतात. एक वर्षापूर्वी कारागृहात टोळीयुद्ध रंगले होते. यात काही कैदी जखमी झाले होते. तसेच, एका कैद्याने वैद्यकीय अधिकाऱ्याला धमकी दिल्याचा प्रकार उघडकीस आला होता.

याशिवाय कैदी राजू दास याने सॅनिटायझर पिऊन तसेच अंगावर ओतून पेटवून घेऊन आत्महत्या करण्याचा प्रयत्न केला होता. त्यामुळे कोलवाळ या ना त्या कारणाने नेहमीच चर्चेत असते.