Colva Drain Pollution: कोलवा येथील नाल्यात कुजलेल्या मासळीचा खच, परिसरात दुर्गंधीने नागरिक हैराण; चार वर्षांपासून नाल्याची साफसफाई रखडली

सासष्टी: कोलवा येथील भरवस्तीतील एका नाल्यात कुजलेल्या मासळीमुळे परिसरात तीव्र दुर्गंधी पसरली आहे. त्‍यामुळे स्थानिक नागरिक त्रस्त झाले आहेत.या प्रकाराची दखल घेत समाजकार्यकर्ते वॉरेन आलेमाव यांनी स्थानिकांसह नाल्याची पाहणी केली. उद्यापासून नाल्याच्या स्वच्छतेच्या कामाला सुरुवात केली जाईल, असे आश्वासन त्यांनी नागरिकांना दिले.

यावेळी बोलताना आलेमाव यांनी सांगितले की, गेल्या चार वर्षांत हा नाला एकदाही स्वच्छ करण्यात आलेला नाही. नाल्यातील पाणी प्रदूषित झाल्याने त्यामधील मासळी कुजली असून त्यामुळे परिसरात दुर्गंधी पसरत आहे. हे काम जलस्रोत खात्याच्या अखत्यारित येत असले, तरी संबंधित विभागाकडून कोणतीही कार्यवाही होत नसल्याची टीकाही त्यांनी केली.

आजपासून स्वच्छता मोहिमेला प्रारंभ

याबाबत संबंधित विभागाला माहिती देण्यात आली होती; मात्र कोणताही प्रतिसाद मिळाला नाही. पंचायत सचिवांनी आरोग्य खात्याशी संपर्क साधण्याचा सल्ला दिला. अखेर वॉरेन आलेमाव यांनी उद्यापासून स्वच्छता मोहीम हाती घेण्याचे आश्वासन दिले आहे, असे स्थानिक रहिवासी माडोना फर्नांडिस यांनी सांगितले.