‘त्या’ मृताच्या कुटुंबीयांकडून नुकसान भरपाईची मागणी

मडगाव : कोलवा येथे गेल्या आठवड्यात वीज धक्क्याने मरण पावलेल्या जयपूर-राजस्थान येथील व्यक्तींच्या कुटुंबीयांनी सरकारकडे नुकसान भरपाईची मागणी केली आहे. मरण पावलेली व्यक्तीच्या पश्‍चात पत्नी, दोन मुले व वयस्क वडील आहेत. त्यांच्या या मागणीला स्थानिकांनीही पाठिंबा दिला आहे.

कुटुंबातील अन्य सदस्यांनी कोलवा येथे येऊन ज्या ठिकाणी त्या व्यक्तीला विजेचा धक्का बसला ती जागा पाहिली आणि वीजवाहिनी उघडी असल्याचे पाहून आश्चर्य व्यक्त केले. हा प्रकार म्हणजे सरकारी खात्याचा निष्काळजीपणा असल्याचे कुटुंबीयातील सदस्य म्हणाले.

ज्या ठिकाणी वीजवाहिनी उघडी आहे तिथे जवळच मुलांना खेळण्याची जागा आहे. या ठिकाणी शेकडो मुले खेळायला येतात. या निष्काळजीपणासाठी सरकारने संबंधितांवर कारवाई करावी, अशी मागणी होत आहे. हा प्रश्न विधानसभेत उपस्थित केला म्हणून स्थानिक आमदार वेन्झी व्हिएगस यांचे स्थानिकांनी अभिनंदन केले. दरम्यान, कोलवा पोलिस स्थानकाने वीज खात्याकडून या घटनेसंबंधी अहवाल मागितला असून, तो आल्यावर चौकशीला सुरवात होईल.