Coastal Clean-up: गोव्यात किनारपट्टी स्वच्छता अभियानाला सुरूवात; राज्यपाल, मुख्यमंत्री, मंत्री सहभागी

गोव्यात किनारपट्टी स्वच्छता अभियानाला (International Coastal Clean-up Day) सुरूवात झाली आहे. पंतप्रधान नरेंद्र मोदी यांचा वाढदिवस तसेच, अमृत महोत्सवानिमित्त या किनारपट्टी स्वच्छता अभियानाचे आयोजन केले आहे. मुख्यमंत्री प्रमोद सावंत (CM Pramod Sawant) यांनी मिरामार बीचवर उपस्थिती लावत स्वच्छता अभियानात सहभाग घेतला. यावेळी भाजपप्रदेशाध्यक्ष सदानंद शेठ तानवडे, राज्यपाल श्रीधरन पिल्लई यांनी उपस्थिती लावली. राज्यपाल, मुख्यमंत्री यांनी यावेळी स्वच्छता अभियानात सहभाग घेतला व उपस्थितांना संबोधित केले.

मुख्यमंत्री प्रमोद सावंत यांनी 'ब्लु इकॉनॉमी'चा उल्लेख करत येणाऱ्या पिढीला स्वच्छ आणि सुंदर सागरी किनारे देण्याची आपली जबाबदारी असल्याचे नमूद केले. गोव्यातील 37 बीचवरती आज स्वच्छता केली जाणार आहे. गोव्यातील नागरिक आणि बाहेरून येणाऱ्या पर्यटकांनी किनारे स्वच्छ ठेवण्यासाठी प्रयत्न केले पाहिजेत. असे सावंत यांनी यावेळी सांगितले.

पर्यटनमंत्री रोहन खंवटे यांनी कळंगुट येथे आयोजित स्वच्छता अभियानात सहभाग घेतला. रोहन खंवटे म्हणाले, सागरी किनाऱ्यांची स्वच्छता अत्यंत महत्वाची आहे. सागर किनारी राहणारे लोक तसेच, जलचरांसाठी ही स्वच्छता गरजेची आहे. तसेच, सूर्य, रेती आणि सागर यासाठी आपले किनारे स्वच्छ आणि सुरक्षित आहेत का याची काळजी आपण घेतली पाहिजे.

सागरी किनारे स्वच्छता मोहिम ही आंतरराष्ट्रीय मोहिम असून, भारत सरकराने गोव्यातील पाच बीच यासाठी निवडले आहेत. मिरामार, बायणा, कोलवा, बोगमाळो आणि वेळसाव (Bogmalo, Baina And Velsao) हे पाच बीच या स्वच्छता मोहिमेचे भाग आहेत.