मुख्यमंत्री प्रमोद सावंत आज गोव्याचा अर्थसंकल्प सादर करणार

पणजी : गोव्यात विधानसभा मंत्रिमडळाच्या सोमवारी झालेल्या शपथविधीनंतर आज बुधवारी अर्थसंकल्प सादर केला जाणार आहे. रोजगार संधी, पर्यटन आणि साधन सुविधांची निर्मिती करणारा, खनिज उद्योग आणि कृषी क्षेत्राला प्रोत्साहन देणारा राज्याचा 2022-23 चा अर्थसंकल्प बुधवारी विधानसभेत मुख्यमंत्री डॉ. प्रमोद सावंत हे अर्थमंत्री या नात्याने सादर करणार आहेत. या अर्थसंकल्पावर सध्या चर्चा केली जाणार नसून केवळ तो मांडला जाणार आहे. पुढील अधिवेशनात त्यावर चर्चा होऊन तो मंजूर केला जाणार आहे. (Goa Budget News 2022-23 News Updates)

मंगळवारपासून सुरु झालेल्या दोन दिवसीय अर्थसंकल्पीय अधिवेशनात आज बुधवारी मुख्यमंत्री संपूर्ण वर्षासाठीचा अर्थसंकल्प (Budget) सादर करतील. यापूर्वीच्या खर्चाच्या पुरवणी मागण्यांना मंजुरी देण्यात येईल. या अधिवेशनात केवळ अर्थसंकल्प सादर केला जाणार असून पुढील अधिवेशनामध्ये यावर सविस्तर चर्चा होऊन हा अर्थसंकल्प मंजूर करण्यात येईल. मात्र, तत्पूर्वीसाठी लागणाऱ्या खर्चाच्या मागण्यांना मंजुरी घ्यावी लागेल. पुढील वर्षभरात खनिज व्यवसाय सुरू करण्यासाठीचे प्रयत्न या अर्थसंकल्पामध्ये असतील. पर्यटन व्यवसायाला प्रोत्साहन देण्यासाठी साधन सुविधांच्या निर्मितीबरोबर प्रामुख्याने रोजगार निर्मितीसाठी सरकारचे विविध प्रयत्न राहतील असे संकेत आहेत

दरम्यान कोरोनाच्या पार्श्वभूमीवर सरकार (Goa Government) सादर करीत असलेला हा अर्थसंकल्प राज्याच्या अर्थव्यवस्थेला गती देणारा बनवण्यासाठीचे प्रमोद सावंत सरकारचे प्रयत्न सुरू आहेत. सध्या सरकारसमोर महसुलाचे मोठे आव्हान आहे. यापुढील काळात जीएसटी (GST) परतावा मिळणार नसल्याचे संकेत यापूर्वीच केंद्र सरकारने दिल्याने राज्याला आपला महसूल वाढवावा लागणार आहे. तर खर्चांना कात्री लावावी लागणार आहे. त्यामुळे हा अर्थसंकल्प अनेक अर्थाने महत्त्वाचा असणार आहे.